Пекинда АҚШ - Хитой музокараси давом этмоқда (+видео)
АҚШ ва Хитой етакчилари 13–15 май кунлари Пекинда бўлиб ўтадиган учрашув давомида муносабатларни барқарорлаштиришга интилишмоқда. Кун тартибидан савдо, Эрондаги уруш ва Тайвань масалалари ўрин олган, деб хабар берди Euronews.
АҚШ президенти Дональд Трамп Хитой раҳбари Си Цзиньпинга икки давлатни биргаликда ажойиб келажак кутаётганини билдирди.
“Сиз билан бирга бўлиш мен учун катта шараф. Сизни дўстим деб билиш ҳам мен учун фахр. Хитой ва АҚШ ўртасидаги муносабатлар энди ҳар қачонгидан ҳам яхши бўлади”, — деди Трамп Пекиндаги музокаралар чоғида.
Си Цзиньпин эса ўз навбатида икки йирик давлат рақиб эмас, балки ҳамкор бўлиши кераклигини таъкидлади.
“Хитой ва АҚШ ўртасидаги барқарор муносабатлар бутун дунё учун фойдалидир. Ҳамкорлик ҳар икки томонга манфаат келтиради, қарама-қаршилик эса зарар етказади. Биз рақиб эмас, балки шерик бўлишимиз керак”, — деди Хитой етакчиси.
Трамп икки кунлик саммит давомида АҚШ ва Хитой ўртасидаги нозик савдо муносабатлари, Эрондаги уруш ҳамда Тайвань масаласи муҳокама қилиниши кутилмоқда.
Трамп Хитой билан қишлоқ хўжалиги маҳсулотлари ва самолётлар хариди бўйича келишувларга эришишни мақсад қилганини айтди. Унинг таъкидлашича, кўпроқ савдо масалалари ҳақида гаплашади.
Шунингдек, Дональд Трамп Хитой раҳбари билан Эрон мавзусида ҳам музокара бўлишини маълум қилди. Чунки, АҚШ санкцияларига қарамай, Эрон нефтининг асосий қисми Хитойга сотилмоқда. Кўпчилик экспертлар эса Трамп Пекиндан Эрон билан келишувга ундовчи чақириқлар кутаётганини башорат қилишмоқда. Бироқ, Трамп АҚШга “Эрон масаласида Хитой ёрдами шарт эмас”, деб ҳисоблашини ҳам айтди.
Си Цзиньпин эса Вашингтоннинг Тайваньга қурол сотиш масаласини кўтариши кутилмоқда. Ўтган йил декабрь ойида АҚШ Тайваньга 10 миллиард доллардан ортиқ миқдорда қурол сотишини эълон қилган эди, аммо етказиб бериш ишлари ҳали бошланмаган.
Пекиндаги учрашув 13–15 май кунлари бўлиб ўтади. Бу — АҚШ президентининг 2017 йилдан бери Хитойга илк ташрифи ҳисобланади. Ўшанда Трамп мамлакатга рафиқаси Мелания Трамп билан бирга келган эди. Бу сафар эса Мелания унга ҳамроҳлик қилмади.
<iframe width="650" height="420" src="https://www.youtube.com/embed/hL57rff6EvQ" title="Pekinda AQSH - Xitoy muzokarasi davom etmoqda" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>Кенжа Бекжонов, Анвархўжа Аҳмедов, ЎзА
