Өзбекстан Президенті «Incheon International Airport Corporation» басшысының міндетін атқарушымен кездесті
Өзбекстан Республикасының Президенті Шавкат Мирзиёев Корея Республикасына сапары аясында «Incheon International Airport Corporation» президентінің міндетін атқарушы Ким Бом Хомен кездесу өткізді.
Кездесуде Үргеніш халықаралық әуежайын жаңғырту және Ташкенттің жаңа халықаралық әуежайын салу жобаларын жүзеге асыру барысы талқыланды.
«Incheon International Airport Corporation» компаниясының Ташкент қаласында өз өкілдігін ашу жоспары қолдау тапты. Оның негізінде әуежайларды басқару, цифрландыру және кадрлар даярлау бағыттары бойынша құзыреттер орталығын құру ұсынылды.
Корея тарапы бірлескен жобаларды жүзеге асыруға белсенді қатысуды жалғастыруға, әуежайларды басқару саласына озық тәжірибе мен технологияларды енгізуге және Өзбекстанмен ұзақ мерзімді серіктестікті кеңейтуге дайын екенін атап өтті.
