Ўзбекистон жамоаси "Act In Space" хакатонида 2-ўринни қўлга киритди

Турин политехника университети талабаларидан иборат NazarX жамоаси Франциянинг Бордо шаҳрида ўтган жаҳон хакатонида модулли сунъий йўлдош лойиҳаси билан иштирок этиб, мамлакатимиз шарафини муносиб ҳимоя қилди.

Мусобақада дунёнинг 23 та давлатидан 391 та жамоа қатнашди. Халқаро босқичнинг биринчи кунида ярим финал баҳслари бўлиб ўтди. Унда жамоалар гуруҳларга бўлинган ҳолда ҳакамлар ҳайъатига ўз лойиҳаларини тақдим этди. Ўзбекистон жамоаси ўз гуруҳида Тайван, Франция, Қозоғистон ва Марокаш вакиллари билан беллашиб, гуруҳ ғолиби сифатида кейинги босқичга йўл олди.

Ярим финал натижаларига кўра, юртдошларимиз гранд финалга чиқди. Финал босқичида энг кучли 5 та жамоа иштирок этди ва якуний натижаларга кўра, Ўзбекистон жамоаси умумжамоа ҳисобида фахрли 2-ўринни эгаллади.

Ушбу ютуқ мамлакатимиз ёшларининг космик технологиялар, муҳандислик ва инновациялар соҳасидаги юқори салоҳиятини яққол намоён этди. Шунингдек, космик саноат ва халқаро ҳамкорликка бўлган қизиқиш ортиб бораётганини тасдиқлайди.

Бундай нуфузли халқаро танловларда иштирок этиш Ўзбекистонни глобал технологик майдонда муносиб намоён эта оладиган янги авлод муҳандислари ва тадқиқотчиларини шакллантиришга хизмат қилади.

Нигора Раҳмонова,

ЎзА