Ўзбекистон ва Хитой тоғ-кон соҳасида ҳамкорликни кенгайтиради
Тоғ-кон саноати ва геология вазири Бобур Исломов Хитойнинг “State Nuclear Uranium Resource Development Co. Ltd” (SNURDC) компанияси раиси Чи Сюэфен бошчилигидаги делегация билан учрашув ўтказди.
Унда икки давлат ўртасидаги ҳамкорлик изчил ривожланиб бораётгани ва бу янги қўшма лойиҳаларни амалга ошириш учун кенг имкониятлар яратаётгани қайд этилди.
Мулоқот давомида Ўзбекистонда тоғ-кон саноатини модернизация қилиш, соҳада амалга оширилаётган ислоҳотлар ҳамда давлат сиёсатининг устувор йўналишлари ҳақида ахборот берилди.
“SNURDC” компанияси раиси Чи Сюэфен Ўзбекистонда амалга оширилаётган ислоҳотларнинг тизимли ва изчил эканини таъкидлади. Шу билан бирга, у компаниянинг мамлакатдаги шериклари билан амалий ҳамкорликни янада кенгайтиришга тайёр эканини маълум қилди.
Учрашув якунида томонлар ўзаро манфаатли ҳамкорликни ривожлантириш, шунингдек, қўшма ташаббусларни амалга ошириш бўйича келишувларга эришди.
Н.Зиёдуллаева, ЎзА
