Ўзбекистон ва Беларусь аграр илм-фан соҳасидаги ҳамкорликни мустаҳкамламоқда
Ўзбекистон Республикаси Президенти Шавкат Мирзиёев Беларусь Республикаси Президенти Александр Лукашенконинг таклифига биноан расмий ташриф билан ушбу мамлакатда бўлиб турибди.
Ушбу ташриф доирасида Ўзбекистон қишлоқ хўжалиги вазири Иброҳим Абдураҳмонов Беларусь Республикаси Бош вазири ўринбосари, Миллий фанлар академияси президиуми раиси Владимир Караник билан учрашди.
Мулоқотда қишлоқ хўжалигида илмий ҳамкорликни ривожлантириш, селекция, уруғчилик ва замонавий агротехнологияларни жорий этиш масалаларига алоҳида эътибор қаратилди, дейилади Қишлоқ хўжалиги вазирлиги маълумотида.
1929 йилда ташкил этилган Беларусь Миллий фанлар академияси мамлакатнинг етакчи илмий муассасаларидан бири саналади. Академияда экинлар селекцияси, уруғчилик, картошкачилик, чорвачилик, қишлоқ хўжалиги техникаларини такомиллаштириш ҳамда ўсимликларнинг генетик ресурсларини сақлаш йўналишларида илмий тадқиқотлар олиб борилмоқда.
Учрашувда Беларусь Миллий фанлар академиясининг Жодино шаҳрида жойлашган Ерчилик бўйича илмий-амалий маркази фаолиятига ҳам алоҳида эътибор қаратилди. Мазкур марказда экинлар селекцияси, элита уруғлари етиштириш, ўсимликларнинг генетик ресурсларини ўрганиш ҳамда замонавий агротехнологияларни ишлаб чиқиш йўналишларида илмий изланишлар олиб борилмоқда.
Шунингдек, Беларусь олимлари томонидан яратилаётган юқори ҳосилдор навлар, ресурс тежамкор технологиялар, аниқ деҳқончилик тизимлари, автоматлаштирилган техника ва рақамли ечимлар қишлоқ хўжалиги самарадорлигини оширишда муҳим аҳамият касб этаётгани қайд этилди.
Томонлар ҳамкорлигининг амалий натижаларидан бири сифатида 2024 йил август ойида Ўзбекистон Ўсимликлар генетик ресурслари илмий-тадқиқот институти ва Миллий генбанки вакилларининг Беларусдаги мазкур марказга ташрифи ҳамда ўсимликлар генетик ресурсларини йиғиш, ўрганиш, сақлаш ва улардан фойдаланиш бўйича халқаро ҳамкорлик тўғрисидаги келишув имзолангани эслатиб ўтилди.
Учрашув якунида томонлар қишлоқ хўжалигида илм-фан ва амалиёт интеграциясини кучайтириш, илғор тажрибаларни алмашиш ҳамда инновацион ишланмаларни амалиётга кенг жорий этиш бўйича ҳамкорликни давом эттиришга келишиб олди.
М. ҲОЖИАКБАРОВА,
ЎзА
