O‘zbekiston oliygohlari Qohiradagi “EDUGATE 2026” ko‘rgazmasida ishtirok etmoqda
Bugungi globallashuv sharoitida oliy ta’lim sohasida xalqaro hamkorlikni kengaytirish, milliy ta’lim tizimini dunyoga tanitish va xorijlik talabalarni jalb etish muhim ahamiyatga ega.
O‘zbekiston ham so‘nggi yillarda bu yo‘nalishda izchil qadamlar tashlab, mamlakat oliy ta’lim muassasalarining xalqaro nufuzini oshirishga alohida e’tibor qaratmoqda.
Ana shu maqsadlarga xizmat qilayotgan muhim tadbirlardan biri — 2026-yilning 28–30-iyul kunlari Misrning Qohira shahrida o‘tkazilayotgan “EDUGATE 2026” xalqaro ta’lim ko‘rgazmasi. Mazkur nufuzli anjumanda “Study in Uzbekistan” loyihasi doirasida O‘zbekistonning oliy ta’lim tashkilotlari o‘zlarining ta’lim dasturlari, ilmiy salohiyati va xalqaro imkoniyatlarini namoyish etmoqda.
Hozirda mamlakatlar o‘rtasidagi raqobat nafaqat iqtisodiyot yoki texnologiya sohasida, balki ta’lim xizmatlari bozorida ham kuchayib bormoqda. Shu nuqtai nazardan, “Study in Uzbekistan” brendi mamlakatimizning zamonaviy ta’lim imkoniyatlarini jahon hamjamiyatiga tanitishda muhim ahamiyat kasb etmoqda.
Qohiradagi ko‘rgazma orqali O‘zbekiston oliygohlari zamonaviy o‘quv dasturlari, innovatsion tadqiqotlari, akademik almashinuv imkoniyatlari hamda xalqaro hamkorlik loyihalarini keng auditoriyaga taqdim etmoqda. Bu esa mamlakatimiz ta’lim tizimining ochiqligi va raqobatbardoshligini yanada namoyon etadi.
Misr va boshqa arab davlatlari yoshlarini O‘zbekiston oliygohlarida ta’lim olishga qiziqtirish mazkur ko‘rgazmaning muhim vazifalaridan biri hisoblanadi. Keyingi yillarda mamlakatimizda xorijiy talabalar uchun yaratilgan qulay shart-sharoitlar, ingliz tilidagi ta’lim dasturlari, zamonaviy kampuslar va akademik mobillik imkoniyatlari sezilarli darajada kengaydi.
Bu esa O‘zbekistonni Markaziy Osiyodagi istiqbolli ta’lim markazlaridan biri sifatida shakllantirishga xizmat qilmoqda.
“EDUGATE 2026” ko‘rgazmasi faqat talabalarni jalb qilish bilan cheklanmaydi. U xorijiy universitetlar bilan qo‘shma ta’lim dasturlarini yo‘lga qo‘yish, ilmiy tadqiqotlar bo‘yicha hamkorlikni rivojlantirish, professor-o‘qituvchilar almashinuvini kengaytirish va ikki tomonlama akademik loyihalarni amalga oshirish uchun ham muhim platforma vazifasini bajaradi.
Ayniqsa, O‘zbekiston va Misr o‘rtasida ta’lim sohasidagi hamkorlikning faollashishi ikki mamlakatning ilmiy salohiyatini birlashtirish va yangi innovatsion tashabbuslarni amalga oshirish uchun keng imkoniyatlar yaratadi.
Muhayyo Toshqorayeva,
O‘zA
