Ўзбекистон-Хитой: тўқимачилик соҳаси вакиллари ҳамкорликни ривожлантиради
"Ўзтўқимачиликсаноат" уюшмасида Хитойнинг "Adsale" компанияси вакиллари билан бўлиб ўтган учрашувда тўқимачилик саноатида технологик ҳамкорликни ривожлантириш ва янги бизнес алоқаларини йўлга қўйиш масалалари муҳокама қилинди.
Учрашувда замонавий тўқимачилик технологиялари ва инновацион ечимлар тақдим этилди. Хусусан, функционал ва композит матолар ишлаб чиқариш, экологик ечимлар, интеллектуал ишлаб чиқариш тизимлари ҳамда тўқимачилик аксессуарлари учун инъекцион қолиплаш технологиялари ҳақида маълумот берилди.
Шунингдек, 2027 йил Хитойнинг Шэньчжэнь шаҳрида ўтказиладиган “CHINAPLAS-2027” халқаро кўргазмаси ҳақида маълумот тақдим этилди.
Мулоқот давомида Ўзбекистон тўқимачилик корхоналари вакилларининг мазкур кўргазмада иштирок этиши, замонавий технологиялар билан танишиши ва хорижий компаниялар тажрибасини ўрганиши масалалари кўриб чиқилди. Хитой компаниялари билан B2B учрашувлар ўтказиш, янги ҳамкорлик алоқаларини йўлга қўйиш ва бизнес имкониятларини кенгайтириш юзасидан фикр алмашилди.
Уюшма ахборот хизматига кўра, тадбир якунида технологик тажриба алмашиш, илғор ишлаб чиқариш ечимларини ўзлаштириш ҳамда тўқимачилик саноатида янги ҳамкорлик лойиҳаларини амалга ошириш имкониятлари кўриб чиқилди. Мазкур мулоқот икки мамлакат корхоналари ўртасидаги технологик ва ишбилармонлик алоқаларини янада кенгайтиришга хизмат қилиши таъкидланди.
Н.Зиёдуллаева,
ЎзА
