O‘zbekiston — Eron: ikki terma jamoa tarkibidagi yulduzlar va eng qimmat futbolchilar
24-sentabr kuni O‘zbekiston milliy terma jamoasi Farg‘onada "Istiqlol" stadionida Eron bilan xalqaro o‘rtoqlik uchrashuvini o‘tkazadi. Bahs oldidan har ikki jamoa tarkibidagi taniqli futbolchilar alohida e’tibor markazida.
O‘zbekistonning eng qimmat futbolchisi — Abduqodir Husanov. “Manchester Siti” himoyachisining bozor qiymati so‘nggi e’lon qilingan Transfermarket ma’lumotlarida 35 million yevro atrofida baholangan. Shu tariqa, Husanov nafaqat O‘zbekiston, balki Markaziy Osiyoning eng qimmat futbolchilaridan biri hisoblanadi.
Fabio Kannavaro yig‘inga Husanov bilan birga terma jamoaning yana bir qator yetakchilarini chaqirgan. Eldor Shomurodov va Abbosbek Fayzullayev ham tarkibning asosiy yulduzlari sanaladi. May oyidagi Transfermarkt baholarida har ikki futbolchining qiymati 7 million yevrodan ko‘rsatilgan. Shomurodov va Fayzullayev hozir Turkiyaning “Istanbul Boshakshehir” klubida, Husanov esa Angliyaning “Manchester Siti” jamoasida faoliyat olib bormoqda.
O‘zbekistonning 32 futbolchidan iborat ushbu yig‘in tarkibida Yevropada o‘ynayotgan yoshlar ham bor. Shveysariyaning “Lugano” klubidan Behruz Karimov, Rossiyaning “Rubin” jamoasidan Jahongir O‘rozov, Belgiyaning “Antverpen” klubidan Muhammadali O‘rinboyev terma jamoaga jalb etilgan.
Eron ham Farg‘onaga tajribali hujumchilari bilan kelmoqda. Amir G‘alenoyi xorijda to‘p suradigan sakkiz futbolchini yakuniy tarkibga qo‘shgan. Ular orasida Eron futbolining ikki katta yulduzi — Mehdi Taremi va Serdar Azmun bor. Taremi “Al-Vasl”, Azmun esa “Shabab Al-Ahli” sharafini himoya qilmoqda.
Taremi Eron safida 108 uchrashuvda 60 gol, Azmun esa 91 o‘yinda 57 gol qayd etgan. Demak, ikki hujumchining terma jamoadagi umumiy ko‘rsatkichi 117 ta golni tashkil qiladi. Bu juftlik O‘zbekiston himoyasi uchun asosiy xavf manbalaridan biri bo‘lishi mumkin.
Eron tarkibida Yevropa klublari vakillari ham mavjud. Mohammad Mohebi Xorvatiyaning “Riyeka”, Dennis Ekert Belgiyaning “Standard”, Shahab Zahedi esa Malayziyaning “Johor Darul Ta’zim” klubidan chaqirilgan. Saman Goddos va Alireza Jahonbaxsh esa bu yig‘inda ishtirok etmaydi.
O‘zbek va jahon sportiga oid eng so‘nggi yangiliklar: @Uzasport
