Ўзбекистон элчиси: Хонкендида шаҳарни ривожлантиришнинг узоқ муддатли концепцияси амалга оширилмоқда
"АзерТАЖ" хабар беришича, Хонкенди шаҳрида узоқ муддатли ва пухта ишлаб чиқилган шаҳарни ривожлантириш концепцияси амалга оширилмоқда, кенг кўламли тиклаш ва бунёдкорлик ишлари олиб борилмоқда.
Бу ҳақда мамлакатимизнинг Бокудаги элчиси Баҳром Ашрафхонов Озарбайжонда рўйхатдан ўтган дипломатик корпус вакилларининг ушбу шаҳарга ташрифи чоғида агентликка берган интервьюсида маълум қилди.
– Ҳар гал Хонкендида жуда кўп ижобий ўзгаришларни кўраман, – деди дипломат. – Бу кентда кенг кўламли тикланиш ва бунёдкорлик ишлари олиб бориляпти. Ривожланиш янги йўл, инфратузилма, ижтимоий ва маданий мажмуалар барпо этилиши билан бирга кечмоқда.
Элчи Қорабоғ университетининг аҳамиятини алоҳида таъкидлаб, янги авлод мутахассисларини тайёрлаш ҳудуд келажаги учун беқиёс аҳамиятга эгалигини таъкидлади:
– Талабалар кўзида учқун кўряпман. Бу жуда яхши, минтақа келажаги учун стратегик аҳамиятга эга.
Шунингдек, Баҳром Ашрафхонов Озарбайжон – Ўзбекистон муносабати сиёсий, иқтисодий, маданий-гуманитар ва таълим соҳаларида фаол ривожланаётганини ҳам қайд этди.
Абдуғафур Маматов, ЎзА
