Осман Местен: Ўзбекистон қудратли тарихи ва маданиятидан куч олиб, дунёга юз тутмоқда
Мамлакатимиз мустақиллигининг 35 йиллик юбилейи кенг шодиёна қилинаётган айни кунларда босиб ўтган шонли йўлимизга назар ташлар эканмиз, барча йўналишларда эришилган натижаларимиздан кўзимиз қувониб, кўнглимиз хотиржамликни ҳис этади.
Улуғ байрам олдидан Тошкент шаҳрида ўтказилган "Мустақил Ўзбекистон – 35 йиллик тараққиёт йўли: ислоҳотлар, натижалар ва истиқболлар" мавзусидаги халқаро илмий-амалий конференцияга ташриф буюрган хорижий парламентарийлар юртимизда амалга оширилаётган ислоҳотларни юксак баҳолаб, ўзларининг илиқ муносабатларини билдирди.
Жумладан, Туркия Буюк Миллат Мажлиси депутати, “Туркия-Ўзбекистон” дўстлик гуруҳи раиси Осман Местен оммавий ахборот воситалари вакилларига берган интервьюсида Ўзбекистоннинг бой тарихи ва маданиятини, бугунги натижаларини алоҳида эътироф этди:
— Ўзбекистон ўз мустақиллигини қўлга киритган кундан бошлаб нафақат Марказий Осиёнинг, балки бутун дунёнинг порлаётган юлдузига айланди. Бунинг сабаби бу замин жуда бой тарихга ва буюк маданиятга эга. Ўзбекистон ўзининг қудратли тарихи ва маданиятига таяниб, ундан куч олган ҳолда янги ислоҳотлар доирасида юксалмоқда ва дунёга юз тутмоқда. Дунёга юз тутар экан, айни пайтда туркий дунёга ҳам ўз эшикларини очмоқда.
Туркия Республикаси Президенти Режеп Таййип Эрдоған ва Ўзбекистон Президенти Шавкат Мирзиёевнинг жуда самимий, чинакам биродарлик ва дўстлик муносабатлари, сиёсий иродаси ўлароқ, барча давлат идоралари, шу жумладан парламентлар ўртасидаги муносабатлар ҳам кундан-кунга кенгайиб бормоқда. Айниқса, сўнгги 10 йил ичида Туркия — Ўзбекистон муносабатларида жуда катта масофа босиб ўтилди. Бугунги кунда Ўзбекистонда фаолият юритаётган турк ишбилармонлари, корхона ва компаниялари Ўзбекистон иқтисодиётига ҳам, Ўзбекистон — Туркия муносабатларига ҳам улкан ҳисса қўшмоқда. Ўзбекистоннинг шиддат билан ривожланаётгани бизни ҳам бирдек қувонтиради. Бу ерлар бизнинг ота маконимиз, юртимиздир.
Биз Ўзбекистон заминини ўз ватанимиздек кўрамиз. 35 йилдан буён, хусусан, сўнгги 10 йил ичида Шавкат Мирзиёевнинг саъй-ҳаракатлари билан Ўзбекистон саноат, технология, қишлоқ хўжалиги ва туризм соҳаларида жуда катта ютуқларга эришди. Шу билан бирга, хотин-қизлар ва ёшларга жуда катта эътибор қаратилмоқда. Аёллар ва ёшлар ҳам ижтимоий, ҳам сиёсий ҳаётда ўз ўринларини топмоқда, уларнинг роли кундан-кунга ортиб боряпти. Президент ёшларнинг камол топиши учун жуда катта имкониятлар яратиб бермоқда. Ўзбекистондаги ўзгаришларни юксак эътироф билан кузатар эканмиз, биз ҳам бундан ғурурланамиз.
Шу фурсатдан фойдаланиб, барча ўзбекистонлик қардошларимни мустақилликнинг 35 йиллиги билан энг самимий тилакларим орқали табриклайман. Ўзбекистон байроғи мангу ҳилпираб турсин. Озарбайжон давлати асосчиси, буюк давлат арбоби Муҳаммад Амин Расулзоданинг шундай сўзи бор: "Бир марта юксалган байроқ, бошқа ҳеч қачон тушмайди". Мен худди шу сўзларни Ўзбекистон учун ҳам айтмоқчиман — бир марта кўтарилган, Ўзбекистоннинг шонли тарихини ифодаловчи, унинг буюклигини, ўзбек халқининг келажагини намоён этувчи ушбу байроқ тоабад самоларда ҳилпираб турсин!
Муҳтарама Комилова ёзиб олди.
ЎзА
