Осиё кубогида 26 нафар футболчимиз иштирок этади
Жорий йилнинг 1-21 март кунлари футбол бўйича аёллар ўртасидаги Осиё кубоги ўтказилади. Қувонарлиси ушбу мусобақада узоқ йиллик танаффусдан сўнг Ўзбекистон аёллар миллий терма жамоаси ҳам иштирок этади.
Осиё кубогида жами 12 та терма жамоа уч гуруҳга бўлинган ҳолда рақобатлашади. Гуруҳ баҳсларида 1-2-поғонани эгаллаган жамоалар тўғридан-тўғри чорак финалга йўл олса, Осиё кубогининг ярим финал иштирокчилари 2027 йил Бразилияда ўтадиган жаҳон чемпионати йўлланмасини қўлга киритади.
Яна энг яхши натижа кўрсатган 2 та 3-ўриндан жой олган терма жамоалар 1/4 финалга чиқади. Қитъа биринчилигининг ярим финал иштирокчилари 2027 йилги жаҳон чемпионати йўлланмасини қўлга киритади. Дарвоқе, чорак финалда мағлубиятга учраган жамоалар эса қўшимча йўлланмалар учун беллашади. Плей-оффдаги икки ғолиб мундиалда иштирок этиш ҳуқуқига эга бўлади. Мағлуб бўлган жамоалар конфедерациялараро плей-офф босқичида ўз омадини яна бир бор синаб кўради.
Ўзбекистон аёллар терма жамоаси “B” гуруҳида Шимолий Корея, Хитой ва Бангладеш билан куч синашади. Термамизнинг илк ўйини 3 март куни Шимолий Кореяга қарши ўтса, Хитой ва Бангладеш билан 6-9 март санасида тўқнаш келади.
Шунингдек, "A" гуруҳидан Австралия, Жанубий Корея, Эрон, Филиппин ўрин олган бўлса, "C" гуруҳида Япония, Вьетнам, Ҳиндистон ва Хитой Тайпейи термалари куч синашади.
Айни пайтда Ўзбекистон аёллар терма жамоаси литвалик мураббий Котрина Кулбите қўл остида Австралияда машғулотларни давом эттирмоқда. Котрина Кулбите Осиё кубогида иштирок этадиган футболчиларнинг якуний рўйхатини эълон қилди ва ушбу таркибдан 26 нафар футболчи қизларимиз ўрин олди.
Жавоҳир Тошхўжаев, ЎзА
