“Opta” Ўзбекистон жой олган гуруҳни “ўлим гуруҳи” деб баҳолади

Спорт статистикаси ва таҳлилларига ихтисослашган Opta Analyst маркази ўзининг “Power Rankings” рейтинги асосида 2026 йилги футбол бўйича Жаҳон чемпионати гуруҳларининг куч даражасини баҳолади.

Тадқиқот натижаларига кўра, АҚШ, Канада ва Мексика мезбонлигида ўтадиган мундиалда энг мураккаб рақобат кутилган учта гуруҳ аниқланган бўлиб, улар шартли равишда “ўлим гуруҳлари” сифатида баҳоланмоқда.

Рейтингда биринчи ўринни “I” гуруҳи эгаллади. Унда Франция, Сенегал, Норвегия ҳамда Ироқ миллий терма жамоалари жой олган бўлиб, гуруҳнинг ўртача мураккаблик кўрсаткичи 81,8 баллни ташкил этган.

Ўзбекистонлик футбол мухлислари учун энг қизиқарлиси - терма жамоамиз ўрин олган “К” гуруҳи. “Opta” таҳлилига кўра, мазкур квартет 81,0 балл билан мундиалнинг иккинчи энг мураккаб гуруҳи сифатида қайд этилган.

Учинчи поғонани эса “J” гуруҳи эгаллаган. Унда амалдаги Жаҳон чемпиони Аргентина терма жамоаси, шунингдек Жазоир, Австрия ва Иордания ўрин олган бўлиб, унинг мураккаблик даражаси 80,5 баллга баҳоланган.

Таҳлилчилар фикрича, турнирнинг нисбатан енгил гуруҳи сифатида “В” квартети қайд этилган. Унинг ўртача рейтинги 70,9 баллни ташкил қилган. Мазкур гуруҳдан Канада, Қатар, Швейцария ҳамда Босния ва Герцеговина ўрин олган.

Шу тариқа, халқаро таҳлилчилар баҳосига кўра, Ўзбекистон миллий терма жамоаси иштирок этадиган “К” гуруҳида плей-офф йўлланмаси учун кураш мундиалнинг энг шиддатли баҳсларидан бири бўлиши кутилмоқда.

Маълумот учун, миллий терма жамоамизнинг “К” гуруҳидаги учрашувлари тақвими қуйидагича кўриниш олган:

1-тур: Ўзбекистон — Колумбия, 18 июнь соат 07:00;

2-тур: Португалия — Ўзбекистон, 23 июнь соат 22:00;

3-тур: Конго ДР — Ўзбекистон, 28 июнь соат 04:30. 

Жавоҳир Тошхўжаев, ЎзА