Оғир атлетика: Акбар Жўраев Хитойда жаҳон чемпионлиги учун майдонга чиқади
Бугун, 6 ноябрь куни Хитойнинг Нинбо шаҳрида оғир атлетика бўйича давом этаётган жаҳон чемпионатининг навбатдаги кунида ўзбек спортининг фахри Акбар Жўраев беллашувларга киришади.
Жаҳон оғир атлетикаси тарихида муносиб ўрин эгаллаб келаётган Акбар Жўраев ўз вақтида “Токио-2020” Олимпия ўйинлари чемпиони ва рекордчиси, “Париж-2024” Олимпиадаси кумуш медали совриндори, икки карра жаҳон ва Осиё чемпионлигига эришган.
Жаҳон чемпионатининг бугунги баҳсларида маҳоратли оғир атлетикачимиз -110 кг. вазн тоифасида медаллар учун курашга киришади.
Мазкур жаҳон чемпионатининг ортда қолган кунларида мамлакатимиз оғир атлетикачиларидан Адҳам Эргашев, Нигора Абдуллаева, Сарварбек Зафаржонов, Муҳаммадқодир Тоштемиров совринли ўринларни эгалламаган бўлса-да “Лос-Анжелес-2028” Олимпиадаси йўлида зарур очколарни қўлга киритишди.
Оғир атлетикачи қизларимиздан Нигора Абдуллаева -53 кг. вазн тоифасида даст кўтаришда 85, 88 ва 90 кг. оғирликларни, силтаб кўтаришда эса 105, 109 ва 111 кг. натижаларни қайд этиб, иккикураш натижасига кўра, 6-ўринни эгаллади.
Сарварбек Зафаржонов эркаклар ўртасида -85 кг. вазндаги баҳсларда даст кўтаришда 162, 166 кг. оғирликларни, силтаб кўтаришда 198 кг. натижани муваффақиятли бажарди ва иккикураш натижасига кўра, 364 кг. кўтарган Сарварбек жаҳон чемпионатини 8-ўрин билан якунлади.
Муҳаммадқодир Тоштемиров - 95 кг. вазн тоифасининг даст кўтариш баҳсларида 166 кг. оғирликни, силтаб кўтаришда 199, 204, 207 кг. оғирликдаги тошларни бўйсундириб, 7-ўриндан жой олди.
Жаҳон чемпионати мусобақалари 8 ноябрга қадар давом этади.
Тўлқин Рўзиев,
ЎзА
