Наманганда “Шунқорлар” ҳарбий-спорт ўйинлари ўтказилди
ФОТОРЕПОРТАЖ
Наманганда “Ватанпарварлик – олий мақсадимиз!” шиори остида Ўзбекистон Республикаси мудофаасига кўмаклашувчи “Ватанпарвар” ташкилоти Марказий кенгаши раиси кубоги учун “Шунқорлар” ҳарбий-спорт ўйинларининг вилоят босқичи бўлиб ўтди.
Мусобақанинг тантанали очилиш маросимида Наманган вилояти ҳокими ўринбосари Отабек Бозоров, “Ватанпарвар” ташкилоти Наманган вилояти кенгаши раиси Аҳмаджон Аълохўжаев, давлат ва жамоат ташкилотлари, Мудофаа ишлари вилоят бўлими ҳамда оммавий ахборот воситалари вакиллари иштирок этди.
Тадбирда сўзга чиққанлар мамлакатимизда ёшларга яратилаётган имкониятлар, уларни ҳарбий-ватанпарварлик руҳида тарбиялаш, жисмонан чиниқтириш ҳамда ҳарбий-амалий кўникмаларини мустаҳкамлаш борасида амалга оширилаётган ишлар ҳақида фикр билдирди.
Мусобақада вилоятнинг шаҳар ва туманларидаги умумтаълим мактаблари ҳамда техникумлардан саралаб олинган 14 та жамоа иштирок этди. 17 ёшдан 22 ёшгача бўлган 140 нафар ўғил-қиз уч йўналиш бўйича ўзаро беллашди.
[gallery-29446]
Қизғин ва муросасиз кечган баҳслар якунига кўра, Чортоқ тумани ёшларидан ташкил топган “Темурбеклар” жамоаси ғолибликни қўлга киритиб, фахрли биринчи ўринни эгаллади. Энди мазкур жамоа республика финал босқичида Наманган вилояти номидан иштирок этади.
Ғолиб ва совриндорларга “Ватанпарвар” ташкилоти ҳамда ҳамкор ташкилотлар томонидан диплом, медаль ва эсдалик совғалари топширилди.
Ҳотам МАМАДАЛИЕВ (сурат), ЎзА
