Нафис нақшларда акс этган ўзбек-тожик дўстлиги (+видео)
Ўзбекистон – нафақат цивилизациялар чорраҳаси, балки инсон қўли билан яратилган мўъжизалар маконидир. Буюк Ипак йўли бўйлаб заминимизда шаклланган ганчкорлик, зардўзлик, кандакорлик ва заргарлик мактаблари асрлар оша мислсиз тароватини йўқотмай келмоқда.
Бой маданий меросимиз намуналари орасида кулолчилик алоҳида ўрин тутади. Зеро, лойга жон бахш этмоқ шунчаки меҳнат эмас, балки халқнинг ақл-заковати, ижодий руҳи ва шу билан бирга азалий қадриятларимиз моддий ифодасидир. Ҳар бир нақш тарихдан сўзлайди, турфа ранглар эса ўтмиш ва келажак тақдирини ўзида мужассамлаштирган. Шу тариқа кулолчилик нафис буюмда халқ меросини жонли ифодалайди.
Шарифжон Турсуновнинг ота-боболари Тожикистондан юртимизга кўчиб келиб, кулолчиликни давом эттирган. Бу ҳунар иккинчи авлод вакили Шарифжоннинг ҳам қон-қонига сингиб кетган муқаддас касб. У яратган чойнак-пиёлалар оддий рўзгор буюми эмас, балки аждодлар нафасини сақлаб турган ёдгорликдир.
Мана шу устахонада оддий тупроқ санъат асарига айланади. Кўза, лаган ёки чойнак наинки кундалик турмушимизга қулайлик бахш этади, балки хонадонларга, қалбларга маданий руҳ, файз олиб киради. Шарифжон мураккаб нақшлар ёрдамида сулолага хос авлодлар тажрибаси, ўтмиш ва келажакни узвий боғлайди.
Қаҳрамонимизнинг ҳар бир куни ёш авлод учун ўзига хос мактаб. Унинг меҳнати кулолчиликни шунчаки ўтмиш мероси эмас, балки замонавий дунёда ҳам яшай оладиган буюк қадриятлигини намоён қилади.
Ушбу кўрсатувни ЎзАнинг “YouTube” каналида кўришингиз мумкин.
<iframe width="640" height="420" src="https://www.youtube.com/embed/lMb0UvAw_uc" title="Nafis naqshlarda aks etgan o‘zbek-tojik do‘stligi" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>Фардона Яхшибоева,
Салим Обиджонов (видеомуҳандис), ЎзА
