Ўқувчиларда ватанпарварлик туйғуларини ривожлантириш, соғлом турмуш тарзига риоя этиш, ёт ғояларга қарши иммунитетни шакллантириш ва ижодий салоҳиятни ошириш, гиёҳвандликнинг жамият ва шахс учун ёмон таъсирини тушунтириш мақсадида Сирдарёда “Мен гиёҳвандликка қаршиман!” кўрик-танловининг вилоят босқичи ўтказилди.

9-11-синф ўқувчилари ўртасида икки йўналишда, яъни иншо ва тасвирий санъат бўйича танловлар ташкил этилди. Унда туман, шаҳар босқичларида қатнашиб 1-ўринни эгаллаган 20 нафар ёш ўзларининг ижодий қобилиятини намоён этиб, фахрли ўринни қўлга киритиш учун ҳаракат қилишди. 

Иншолар йўналиши бўйича Мирзаобод туманидаги 1-умумтаълим мактабининг 9-синф ўқувчиси Сўғдиёна Ҳазратқулова, тасвирий санъат йўналиши бўйича Гулистон шаҳридаги 11-умумтаълим мактабининг 10-синф ўқувчиси Назира Жуманазаровалар фахрли 1-ўринни қўлга киритди. Асосийси, улар иншо ва тасвирий санъат йўналиши орқали гиёҳвандлик, унинг салбий оқибатлари тўғрисидаги фикрларни намойиш этишди. 

Танлов ғолиблари диплом ва эсдалик совғалари билан тақдирланди. Бундан ташқари, иншо ва тасвирий санъат йўналишлари бўйича 1-ўринни қўлга киритган ўқувчилар Республика босқичида иштирок этиш ҳуқуқини қўлга киритдилар. 

Ғулом Примов, ЎзА мухбири