Маҳаллий ишлаб чиқарувчилар билан очиқ мулоқот
Саноат кооперацияси ва давлат харидлари агентлигида маҳаллий ишлаб чиқарувчилар ҳамда тадбиркорлик субъектлари иштирокида “Маҳаллий ишлаб чиқарилган товар тўғрисидаги сертификатни расмийлаштириш жараёни: муаммо ва таклифлар” мавзусида очиқ мулоқот бўлиб ўтди.
Сертификатлаштириш жараёнида тадбиркорлар дуч келаётган масалаларни бевосита ўрганиш, уларнинг таклифларини тинглаш ҳамда мавжуд муаммоларга амалий ечимлар ишлаб чиқиш мақсадида ташкил этилган тадбирда Тошкент шаҳридаги тадбиркорлар билан бир қаторда, республиканинг турли ҳудудларидан 70 га яқин маҳаллий ишлаб чиқарувчилар ва тадбиркорлик субъектлари онлайн тарзда мулоқотда қатнашди.
Тадбир давомида “Ўзбекэкспертиза” АЖ вакиллари томонидан Ўзбекистонда товарларнинг маҳаллий корхоналар томонидан ишлаб чиқарилганини аниқлаш бўйича экспертиза ўтказиш тартиби, маҳаллий ишлаб чиқарилганлик мезонлари, маҳаллий ишлаб чиқарилган товар тўғрисидаги сертификатни расмийлаштириш жараёни ва хизмат учун тўлов тартиби юзасидан батафсил тушунтиришлар берилиб, тақдимот қилинди.
Ҳар бир мурожаат юзасидан тегишли тушунтириш ва жавоблар тақдим этилди. Шунингдек, тадбиркорларнинг таклиф ва мулоҳазалари тингланиб, сертификатлаштириш жараёнини янада такомиллаштириш, ортиқча вақт ва харажатларни камайтириш ҳамда ишлаб чиқарувчилар учун қулай механизмларни шакллантиришга доир масалалар муҳокама қилинди.
Гулноза Бобоева,
ЎзА
