Мадуро ва рафиқасига янги айблов: гап қийноқ ҳақида
Собиқ Президент Николас Мадуро ва унинг рафиқаси Силия Флоресга АҚШда янги айблов қўйилиши кутиляпти. Жуфтлик Венесуэла қамоқхоналарида ноқонуний ушлаб турилган америкаликларни қийноққа солишда иштирок этганликда гумон қилинмоқда.
Федерал прокуратура янги айбловни шу ҳафта илгари суриши мумкин. CBS маълумотига кўра, бу иш доирасида яна бир неча шахсга нисбатан Венесуэла ҳукумати томонидан Мадуро даврида ушлаб турилган 12 нафар америкалик қийноққа солинган жараёнда қатнашганлик айби илгари сурилиши эҳтимоли бор. Флорес 8 октябрь куни Нью-Йорк федерал судида гаров масаласи бўйича кечадиган мажлисда иштирок этиши керак.
Мадуро ва Флорес 3 январь куни Каракасдаги қароргоҳидан АҚШ кучлари томонидан тунги амалиёт давомида олиб кетилиб, Нью-Йоркка келтирилган. Улар гиёҳванд модда савдоси ва қурол билан боғлиқ жиноятда айбланган. Маҳбуслар ҳар қандай айбловларни инкор этяпти. Адвокатлар суддан ишни тугатишни сўраган. Улар собиқ Президент суверен давлат раҳбари сифатида дахлсизликка эгалиги, уни куч ишлатиб олиб кетиш қонунга зид эканини таъкидламоқда. Судья бу илтимос бўйича ҳали қарор чиқармаган, иш бўйича суд жараёни 2027 йил июнигача белгиланган.
Мусулмон Зиё, ЎзА
