Мўйноқда қамишдан ДСП ишлаб чиқарилади
Хитойнинг “Panjin Jijia Ecological Board Industry Co., Ltd” компанияси Мўйноқда қамишдан ДСП ишлаб чиқаришни режалаштирмоқда.
Хитойнинг “Panjin Jijia Ecological Board Industry Co., Ltd” компанияси Мўйноқда қамишдан ДСП ишлаб чиқаришни режалаштирмоқда. Шу мақсадда мазкур компаниянинг бошқарув раиси Жанг Бинг Кун бошчилигидаги делегация Мўйноққа келди.
Компания туманда қамишни қайта ишлаш орқали тайёр қурилиш материалларини ишлаб чиқаришга қизиқиш билдираётир. Меҳмонларга Ўзбекистон Республикаси Бош прокуратурасининг Қорақалпоғистон Республикаси Мўйноқ туманини ривожлантиришга оид қонунчилик ижроси устидан назорат бошқармаси томонидан ҳудуднинг инвестицион имкониятлари ҳақида батафсил маълумот берилди. Туманда жойлашган табиий кўллар ва қамишзорлар билан таништирилди.
Мазкур икки томонлама музокаралар Бош прокуратура, “Ўзқурилиш материаллари” АЖ уюшмаси томонидан қўллаб-қувватланмоқда.
Музокаралар якунида “Panjin Jijia Ecological Board Industry Co., Ltd” компанияси ва “Toshkent Plast Polimer Co., Ltd” корхонаси ўртасида қамишдан ДСП ишлаб чиқаришни йўлга қўйиш бўйича 45 миллион долларлик инвестиция шартномаси имзоланди.
Эслатиб ўтамиз, Ўзбекистон Республикасида мавжуд қамишзорлар майдонининг 57 фоизи, Қорақалпоғистон Республикасида мавжуд қамишзорлар майдонининг 78 фоизи Мўйноқ туманига тўғри келади.
