Киев Россия билан музокаралар шартларини ўзгартириши мумкин (+видео)
Украинанинг БМТдаги доимий вакили Андрей Мельник Киев Россия билан музокаралар бўйича ўз позициясини қайта кўриб чиқиши мумкинлигини маълум қилди, деб хабар берди DW нашри
Унинг айтишича, агар БМТ Хавфсизлик Кенгаши Россиянинг Украинага қарши ҳаракатларига муносабат билдиришни кечиктиришда давом этса, Киев амалдаги фронт чизиғи бўйлаб ўт очишни тўхтатиш таклифини ўзгартириши мумкин.
«Украина адолатли ва барқарор тинчликка эришиш учун Россия билан тўғридан-тўғри музокараларга тайёр. Аммо сабримизнинг ҳам чегараси бор», деди Мельник.
Унинг таъкидлашича, сўнгги 15 ой давомида Украина БМТ Хавфсизлик Кенгашини тўлиқ ва шартсиз ўт очишни тўхтатиш ҳақида резолюция қабул қилишга чақириб келмоқда, аммо бу борада амалий натижа бўлмаган.
Мельникнинг фикрича, фронт чизиғи бўйлаб ўт очишни тўхтатишнинг ўзи ҳам Украина учун катта муроса ҳисобланади.
Украина вакили сўнгги ойларда уруш динамикаси ўзгарганини ҳам таъкидлади. Унинг сўзларига кўра, Россиядаги нефтни қайта ишлаш заводларининг қарийб 40 фоизи зарар кўрган ва бу Кремль ҳарбий салоҳиятига таъсир қилмоқда.
Шунингдек, у Москва атрофида яратилган ҳаво мудофаа тизими ҳам барча ҳарбий объектларни ҳимоя қилишга қодир эмаслигини айтди.
Андрей Мельник Россиянинг БМТдаги вакилига мурожаат қилиб, босиб олинган ҳудудларни сақлаб қолишнинг иложи йўқлигини ва Россия қўшинлари Украина ҳудудини тарк этиши кераклигини билдирди.
<iframe width="458" height="815" src="https://www.youtube.com/embed/eLrVyy0apcc" title="Kiyev Rossiya bilan muzokaralar shartlarini o‘zgartirishi mumkin" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>Кенжа Бекжонов, Улуғбек Тўхтаев, ЎзА
