Калифорнияда учоқ қулаб тушди: қурбонлар бор
АҚШ Калифорния штатининг Фресно аэропорти яқинида енгил моторли самолёт ҳалокатга учраши оқибатида икки нафар бола ҳаётдан кўз юмди, яна икки нафар катта ёшли йўловчи оғир жароҳат олди.
Таъкидланишича, тўрт кишини олиб кетаётган учоқ 5 сентябрь куни маҳаллий вақт билан соат 13:50 атрофида Сьерра-Скай-Парк яқинидаги Сан-Хоакин дарёси атрофига қулаб тушган. Қутқарувчилар ҳаво кемаси қолдиқларини дарё яқинидаги жарликдан топишди. “Abc” нашрининг ёзишича, ҳодиса жойига яқин бўлган тепалик ёнбағрида ёнғин юзага келган.
Оғир аҳволда бўлган икки нафар катта ёшли фуқаро дарҳол шифохонага етказилган. Ҳалок бўлган болаларнинг шахси ва ёшига ҳозирча аниқлик киритилмаган. Мамлакат Федерал авиация бошқармаси ҳамда Миллий транспорт хавфсизлиги кенгаши мутахассислари авиаҳалокат сабабларини ўрганишмоқда.
Ф.Яхшибоева, ЎзА
