ЖАРда мигрантларга қарши кескинлик кучайди
Жанубий Африка Республикасининг қатор йирик шаҳарларида муҳожирларга қарши режалаштирилган намойишлар арафасида хавотир кучайиб, кўплаб дўконлар ёпилди, жамоат транспорти ҳаракати чекланди.
“Reuters” агентлиги хабар беришича, аҳолининг бир қисми эҳтимолий тўқнашувдан хавотирланиб ишга чиқмаган. Африканинг турли давлатларидан келган кўплаб муҳожирлар ҳам хавфсизлик нуқтаи назаридан иш жойларига бормаган.
Намойиш ташкилотчилари ҳужжатсиз муҳожирлар мамлакатни тарк этиши учун муддат белгилаган. Бу чақириқ кўпчилик томонидан жисмоний таҳдид сифатида қабул қилинган.
Йоханнесбург ва Дурбан шаҳарларида айрим уй эгалари бинога зарар етказилишидан хавотирланиб, чет эллик ижарачиларни чиқариб юбораётгани айтиляпти.
Тартибни сақлаш мақсадида бир неча шаҳарда полиция ва ҳарбийлар кучайтирилган тартибда кўчаларга жойлаштирилди. Расмийлар намойиш тинч ўтиши учун зарур чора кўрилаётганини маълум қилди.
Жанубий Африка Республикаси Президенти Сирил Рамафоса ноқонуний миграция бўйича жамиятдаги хавотирни тан олган ҳолда, норозилик акцияси таҳдид, зўравонлик ва бебошликка айланмаслиги кераклигини таъкидлади.
Д.Ҳакимов, ЎзА
