Investiyaviy hamkorlik amaliy samaralar beradi

Xorijiy investitsiyalarni jalb etish, hududlarning ishlab chiqarish salohiyatini to‘liq ishga solish va milliy mahsulotlar uchun yangi tashqi bozorlarni ochish bugungi iqtisodiy taraqqiyotning o‘zaro chambarchas bog‘liq yo‘nalishlaridir. Bu vazifalarning amaliy ijrosi, avvalo, joylardagi rahbarlarning tashabbuskorligi, investorlar bilan ishlash samaradorligi va ilgari surilgan takliflarni aniq iqtisodiy natijalarga aylantira olishida namoyon bo‘ladi.

Jizzax viloyati hokimi Ulug‘bek Mustafoyev boshchiligidagi delegatsiyaning Xitoy Xalq Respublikasi va Gonkongdagi uchrashuvlari, shuningdek, viloyat savdo uyining ochilishiga ham aynan shu nuqtai nazardan baho berish lozim.

Zero, xorijiy mamlakatlarga xizmat safari – shunchaki uchrashuvlar o‘tkazish yoki hamkorlik niyatlarini bildirish emas. Uning haqiqiy samarasi jalb etilgan investitsiya miqdori, ishga tushirilgan korxonalar, yaratilgan ish o‘rinlari, mahalliylashtirilgan mahsulotlar va eksport tushumlarida ko‘rinadi. Shu bois, Jizzax delegatsiyasi olib borayotgan muzokaralarning ahamiyati ularning yakunida qanday aniq loyihalar shakllanishi va belgilangan tashabbuslar qay darajada amalga oshirilishi bilan belgilanadi.

Islohotlar samarasi

Davlatimiz rahbari raisligida 2026-yil 25-iyunda qurilish materiallari sanoatini rivojlantirish va hududlarda investitsiya loyihalarini amalga oshirish masalalari yuzasidan o‘tkazilgan videoselektor yig‘ilishida har bir kelishuvni aniq loyihaga, ish o‘rniga va yuqori qo‘shilgan qiymatga aylantirish zarurligi alohida ta’kidlandi. Hokimlar oldiga investitsiyalarning sifati va samaradorligini oshirish, hududlarning imkoniyatlarini chuqur o‘rganish hamda iqtisodiy qiymati yuqori bo‘lgan loyihalarni shakllantirish vazifasi qo‘yildi.

Bu talabning mohiyati shundaki, investitsiya ko‘rsatkichlarining o‘zi yakuniy natija emas. Jalb etilgan sarmoya ishlab chiqarish quvvatlarini ishga tushirishi, mahsulot tannarxini maqbullashtirishi, mehnat unumdorligini oshirishi va aholi bandligiga xizmat qilishi kerak. Ayniqsa, hududlarning tabiiy resurslari, mavjud sanoat bazasi va mehnat salohiyatidan kelib chiqib loyihalar tanlash muhimdir.

Jizzax viloyati delegatsiyasining Xitoydagi muzokaralari mazmunan ana shu vazifalarga mos keladi. Biroq bu muvofiqlikni faqat uchrashuvlar soni bilan emas, balki muzokaralar natijasida shakllanadigan loyihalarning iqtisodiy asoslanganligi, moliyalashtirish manbalari va amalga oshirish muddatlari bilan baholash zarur.

Farmondan amaliy natijaga

Davlatimiz rahbarining 2026-yil 27-avgustdagi "O‘zbekiston Respublikasi Prezidentining tadbirkorlar bilan VI ochiq muloqotida belgilangan vazifalarni amalga oshirish chora-tadbirlari to‘g‘risida"gi farmoni tadbirkorlikni qo‘llab-quvvatlash, investitsiyaviy faollikni rag‘batlantirish va eksport salohiyatini oshirishga qaratilgan muhim huquqiy asoslardan biridir.

Farmonda tadbirkorlik sub’ektlarining barqaror o‘sishini ta’minlash, ularni moliyaviy qo‘llab-quvvatlash mexanizmlarini kengaytirish, innovatsiyalarni joriy etish hamda milliy mahsulotlarni tashqi bozorlarga olib chiqishga oid chora-tadbirlar belgilangan. Jumladan, hujjatning eksport salohiyatini oshirish va milliy brendlarni tashqi bozorlarga olib chiqishga bag‘ishlangan qismida tashqi bozorlarda talab yuqori bo‘lgan mahsulotlarni saralash, korxonalar ishlab chiqarishini xaridorlar ehtiyojiga moslashtirish, xalqaro standartlar va sertifikatlash masalalariga e’tibor qaratish nazarda tutilgan.

Jizzax viloyatining xorijda savdo uyi tashkil etishi, yangi investorlar bilan ishlashi va mahalliy mahsulotlar uchun bozor izlashi ushbu vazifalarning hududiy darajadagi amaliy yo‘nalishlari bilan hamohangdir. Endigi vazifa mazkur tashabbuslarni farmonda belgilangan ustuvor vazifalar bilan muvofiqlashtirish, ularning ijrosini aniq ko‘rsatkichlar asosida baholash va erishilgan natijalarni muntazam tahlil qilib borishdir.

Investor bilan muzokara – yangi ishlab chiqarish sari qadam

Gonkongda Jizzax viloyati hokimi Ulug‘bek Mustafoyev boshchiligidagi delegatsiya a’zolarining "JDB Group" kompaniyasi prezidenti janob Chen Hung To bilan uchrashuvida bir qator istiqbolli yo‘nalishlar muhokama qilindi. Xususan, mineral suv va shifobaxsh o‘simlik choylari ishlab chiqarish, rangli metall konlarini o‘zlashtirish va xomashyoni chuqur qayta ishlash, qurilish materiallari sanoatini rivojlantirish, qayta tiklanuvchi energiya manbalari, farmatsevtika, charm-poyabzal hamda sut mahsulotlarini qayta ishlash bo‘yicha takliflar ko‘rib chiqildi.

Ushbu yo‘nalishlarning har biri muayyan iqtisodiy imkoniyatlarni qamrab oladi. Masalan, mahalliy xomashyoni chuqur qayta ishlash orqali tayyor mahsulot turlarini ko‘paytirish, qo‘shilgan qiymatni oshirish va import o‘rnini bosuvchi mahsulotlar ishlab chiqarish mumkin. Qayta tiklanuvchi energiya loyihalari esa korxonalarning energiya ta’minoti va ishlab chiqarish xarajatlariga ta’sir ko‘rsatishi mumkin. Farmatsevtika va oziq-ovqat mahsulotlarini qayta ishlash sohalarida esa sifat standartlari, texnologiyalar transferi va barqaror xomashyo ta’minoti muhim ahamiyat kasb etadi.

Viloyat hokimining "JDB Group" kompaniyasini, jumladan, Zomin tumanidagi istiqbolli loyihalarga tayanch investor sifatida jalb etish taklifi hamkorlikni aniq hududiy ehtiyojlar bilan bog‘lashga qaratilgan. Kompaniya prezidenti takliflarning iqtisodiy samaradorligini o‘rganish, tegishli sohalarga yirik kompaniyalarni jalb etish va hamkorlikni davom ettirishga tayyorligini bildirgan.

Tomonlar 2026-yil 19-22-oktabr kunlari kompaniya prezidentining Jizzax viloyatiga amaliy tashrifini tashkil etish, loyihalarni joyida o‘rganish va ularni amalga oshirish bo‘yicha keyingi chora-tadbirlarni belgilashga kelishib olgan. Mazkur tashrif loyihalarning imkoniyatlarini bevosita baholash, ishlab chiqarish maydonlari va infratuzilma bilan tanishish, zarur hisob-kitoblarni aniqlashtirish uchun muhim bosqich bo‘lishi mumkin.

Ayni paytda, muhokama qilingan yo‘nalishlarning barchasi amalga oshirilishi aniq bo‘lgan loyihalar sifatida emas, balki o‘rganish va kelishish jarayonidagi takliflar sifatida qaralishi lozim. Ularning har biri bo‘yicha investitsiya hajmi, amalga oshirish muddati, ishlab chiqarish quvvati, eksport imkoniyati va yaratiladigan ish o‘rinlarini belgilash keyingi ishlarning ustuvor vazifasidir.

Gonkongdagi savdo uyi – eksport uchun yangi maydon

Hamkorlik doirasida Gonkong shahrida Jizzax viloyatining savdo uyi ochilgani mahalliy ishlab chiqaruvchilar uchun tashqi bozorlarga chiqish imkoniyatlarini kengaytirishga qaratilgan amaliy qadamdir. Ushbu maskanda viloyat korxonalari mahsulotlarini namoyish etish, xorijiy xaridorlarga taqdim qilish va ishbilarmon doiralar bilan to‘g‘ridan-to‘g‘ri aloqalar o‘rnatish ko‘zda tutilgan.

Biroq savdo uyining samaradorligi uning ochilgani bilan emas, balki qancha korxona mahsulotlari taqdim etilgani, nechta salohiyatli xaridor bilan aloqa o‘rnatilgani, qanday shartnomalar tuzilgani va amalda qancha mahsulot eksport qilingani bilan belgilanadi. Shuning uchun uning faoliyatini bozor talabini o‘rganish, mahsulotlarni sertifikatlash, qadoqlash, narx raqobatbardoshligini ta’minlash va yetkazib berish zanjirlarini shakllantirish bilan uyg‘un olib borish zarur.

Gonkongdagi savdo uyi mahalliy korxonalar uchun oddiy namoyish maydoni bo‘lib qolmasdan, bozor haqida ma’lumot olish, xaridorlar bilan muzokara o‘tkazish, buyurtmalarni shakllantirish va eksport shartnomalarini tuzishga ko‘maklashadigan doimiy iqtisodiy ko‘prikka aylanishi kerak. Buning uchun uning faoliyatini aniq maqsadli ko‘rsatkichlar asosida tashkil etish, korxonalar bilan muntazam ishlash va eksport natijalarini tahlil qilish muhim.

Asosiy mezon – xalq farovonligiga qo‘shilgan hissa

Jizzax viloyati delegatsiyasining Xitoy va Gonkongdagi muzokaralari xorijiy investitsiyalarni jalb etish, ishlab chiqarishni diversifikatsiya qilish va eksport geografiyasini kengaytirish uchun yangi imkoniyatlar ochishi mumkin. Endi bu imkoniyatlarning iqtisodiy samarasini ta’minlash uchun har bir tashabbusni puxta hisob-kitob, aniq muddat va mas’ullar bilan bog‘lash, investorlar bilan muloqotni amaliy natijaga qadar izchil davom ettirish talab etiladi.

Prezident farmonida belgilangan vazifalar ijrosi ham aynan shunday yondashuvni taqozo etadi: huquqiy hujjatdagi maqsadlar hududlardagi aniq loyihalarga, loyihalar esa yangi ishlab chiqarish quvvatlari, barqaror ish o‘rinlari va eksport tushumiga aylanishi kerak. Shu jihatdan, Jizzax viloyatining xorijiy hamkorlar bilan ishlashi va Gonkongda savdo uyi ochishi natijaga yo‘naltirilgan iqtisodiy faoliyatning muhim yo‘nalishlaridan hisoblanadi.

Zero, investitsiyaviy hamkorlikning eng ishonchli mezoni erishilgan kelishuvlar soni emas, balki ularning mamlakat iqtisodiyotiga qo‘shgan hissasi, tadbirkorlar uchun yaratgan imkoniyatlari va aholi farovonligida aks etgan amaliy natijalaridir.

Abdujalol Qayumov,

O‘zA muxbiri