Ғолибоф: Эрон нефть сотмаса, минтақадаги ҳеч бир мамлакат ҳам хом ашё сота олмайди
Эрон парламенти спикери Муҳаммад Бағир Ғолибоф Теҳрон нефть экспортидан маҳрум этилган тақдирда, минтақадаги ҳеч бир давлат ўз хом ашёсини сота олмаслигини маълум қилди. Унинг таъкидлашича, хавфсизлик кафолатланмаган шароитда Яқин Шарқдаги ҳеч бир энергетика инфратузилмаси дахлсиз бўлиб қолмайди.
Шунингдек, расмий АҚШ Эрон нефть ва газ объектларига ҳужум қилгудек бўлса, Вашингтоннинг Форс кўрфази ҳамда Ҳурмуз бўғоздаги энергетика инфратузилмаси ва активи жавоб зарбасига нишон бўлишини уқтирди.
Бундай қатъий баёнот Теҳроннинг санкция ва Америка томонидан ўрнатилган денгиз қамали сабаб нефть экспорти нолга тушиб қолган бир шароитда янгради. Президент Дональд Трамп Ислом Республикасининг Ҳурмуз орқали тижорий кемалар ҳаракатини етти кун ичида тиклаш таклифини рад этиб, Вашингтон стратегик сув йўлини тўлиқ назорат қилаётганига урғу берди. Эрон эса музлатилган активларни озод қилиш, нефть санкциясини бекор қилиш ва портлар қамалини тугатиш шарти бажарилмагунча, бўғиз тўлиқ очилмаслигини билдирган.
Қолаверса, ташқи ишлар вазири Аббос Арағчий Қатар воситачилигида Вашингтонга Ҳурмузни очиш шарти бўйича янги таклиф етказилишини айтди. Сиёсий ва иқтисодий босим фуқаролик авиацияси соҳасига ҳам ёйилаётган бир пайт Ғолибоф Эрон ҳеч қачон ҳаво ёки тижорий қамал олдида чекинмаслиги, ҳар қандай таҳдидга тезкор ҳамда рақиб афсусланадиган даражада қақшатқич жавоб қайтарилишини таъкидлади.
Ф.Яхшибоева, ЎзА
