Германия канцлери Трампга қўнғироқ қилди (+видео)
Германия канцлери Фридрих Мерц телефон орқали АҚШ президентини Эрон билан урушни тўлиқ тўхтатиш учун дипломатик ҳаракатларни давом эттиришга чақирди, деб хабар берди DW нашри.
Эрон ва АҚШ ўртасида ўт очишни тўхтатиш бўйича келишувга эришилгандан сўнг, 8 апрель куни канцлер Фридрих Мерц АҚШ президенти Дональд Трамп билан телефон орқали гаплашди.
Мерц ўт очишни тўхтатишни қўллаб-қувватлаб, урушни батамом тугатиш учун музокараларни давом эттириш кераклигини айтди. Шунингдек, бу орқали глобал энергетик инқирознинг олдини олиш мумкинлигини таъкидлади.
Шунингдек, канцлер Ҳурмуз бўғозида кемалар ҳаракати эркинлигини таъминлашга ўз ҳиссасини қўшишини ҳам билдирган.
Мерцнинг айтишича, АҚШ ва Эрон ўртасидаги кейинги музокаралар Эрон аҳолисини ҳимоя қилиш ва минтақада хавфсизликни таъминлашга ёрдам беради. Германия бу дипломатик саъй-ҳаракатларни қўллаб-қувватлайди.
Германия ташқи ишлар вазири Йоханн Вадефуль ҳам ўт очишни тўхтатишни олқишлади. У буни тинчликка олиб борадиган муҳим биринчи қадам деб атади. Шу билан бирга, уруш давом этса, жиддий оқибатларга олиб келиши билан огоҳлантирди.
Немис кемасозлар уюшмаси ҳам АҚШ, Исроил ва Эрон ўртасидаги келишувни қўллаб-қувватлади. Улар буни айниқса бир неча ҳафта давомида ноаниқ шароитда ишлаган минглаб денгизчилар учун яхши хабар деб баҳолади.
8 апрелга ўтар кечаси АҚШ ва Эрон икки ҳафталик ўт очишни тўхтатишга келишиб олди. Бу келишув Трамп берган ультиматум муддати тугашига бир соат қолганда амалга оширилди. Трамп буни АҚШнинг тўлиқ ғалабаси деб атади.
Эрон эса бу келишувни ўз ғалабаси сифатида баҳолади ва АҚШ Ҳурмуз бўғози устидан Эрон назоратини тан олганини маълум қилди.
<iframe width="650" height="420" src="https://www.youtube.com/embed/3lIbzea9QT0" title="Germaniya kansleri Trampga qo‘ng‘iroq qildi" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>Кенжа Бекжонов, Анвархўжа Аҳмедов, ЎзА
