ФОТОГАЛЕРЕЯ: Тараққиётнинг янги босқичидаги Қашқадарё
Мустақиллигимизнинг 35 йиллиги олдидан
«Ягона Ватан, ягона халқ бўлиб, янги ҳаёт
ва келажак яратамиз!»
Мустақиллик йилларида Қашқадарё вилоятида кенг кўламли ўзгаришлар амалга оширилди. Бой табиий ресурслар, қадимий тарих ва юксак меҳнат салоҳиятига эга воҳа бугун саноат, қишлоқ хўжалиги, тадбиркорлик, туризм ва ижтимоий соҳалардаги янгиланишлар билан янги қиёфа касб этмоқда.
Қашқадарё мамлакатимиз саноат салоҳиятида муҳим ўрин тутади. Нефть-газ, кимё, энергетика ва бошқа йўналишлардаги йирик корхоналар қаторида янги ишлаб чиқариш қувватлари ва инвестиция лойиҳалари ҳам ишга туширилмоқда. Ишлаб чиқаришни модернизация қилиш, маҳаллий хомашёни чуқур қайта ишлаш, рақобатбардош маҳсулотлар ишлаб чиқариш ва экспорт салоҳиятини оширишга қаратилган ишлар изчил давом этмоқда.
Вилоятда тадбиркорлик ва хизмат кўрсатиш соҳалари ҳам жадал ривожланмоқда. Маҳаллаларда янги лойиҳаларнинг амалга оширилиши, кичик бизнес ва хусусий ташаббусларни қўллаб-қувватлаш аҳоли бандлигини таъминлаш, янги иш ўринлари яратиш ва даромадларни оширишга хизмат қилмоқда.
[gallery-31006]
Қашқадарёнинг бой деҳқончилик анъаналари замонавий агротехнологиялар билан уйғунлашмоқда. Пахта ва ғалла етиштириш, боғдорчилик, сабзавотчилик, чорвачилик, ер ва сув ресурсларидан самарали фойдаланиш борасида янги ёндашувлар жорий этилмоқда. Сув тежовчи технологиялар, интенсив боғлар ва қишлоқ хўжалиги маҳсулотларини қайта ишлаш қувватларининг кенгайтирилиши тармоқда юқори қўшилган қиймат яратиш имконини бермоқда.
Воҳада ижтимоий соҳани ривожлантириш, аҳоли учун муносиб турмуш шароитларини яратишга ҳам алоҳида эътибор қаратилмоқда. Янги ва замонавий мактаблар, таълим муассасалари, тиббиёт объектлари, спорт иншоотлари, маданият масканлари барпо этилиб, маҳаллалар ободонлаштирилмоқда.
Ёшларнинг замонавий билим ва касбларни эгаллаши, спорт билан шуғулланиши учун яратилаётган имкониятлар уларнинг салоҳиятини рўёбга чиқаришга хизмат қилмоқда. Деҳқон ва фермерлар, ишчи ва муҳандислар, ўқитувчи ва шифокорлар, тадбиркор ва ҳунармандлар ўз меҳнати билан воҳа тараққиётига муносиб ҳисса қўшмоқда.
Қашқадарёнинг тарихий ва табиий салоҳияти туризм соҳасини ривожлантириш учун кенг имконият яратади. Қадимий Кеш — Шаҳрисабзнинг меъморий обидалари, Китоб ва Яккабоғнинг сўлим табиати, тоғолди ҳудудлари, тарихий қадамжолар ҳамда миллий ҳунармандчилик анъаналари сайёҳлар учун жозибадор масканлар ҳисобланади. Бу имкониятлардан самарали фойдаланиш, туризм инфратузилмасини ривожлантириш ва янги сайёҳлик йўналишларини ташкил этиш борасида ишлар олиб борилмоқда.
Қурилиш ва бунёдкорлик ишлари ҳам вилоятнинг янгиланиб бораётган қиёфасини намоён этмоқда. Янги турар жойлар, ижтимоий объектлар, ишлаб чиқариш бинолари ва инфратузилма лойиҳалари шаҳар ва туманлар ривожига янги мазмун бағишламоқда.
Бугунги Қашқадарё — саноат ва қишлоқ хўжалиги, тадбиркорлик ва меҳнат, тарих ва туризм, бунёдкорлик ва инсон қадри уйғунлашган замин. Мустақилликнинг 35 йиллиги арафасида воҳанинг бугунги қиёфасида амалга оширилаётган ислоҳотлар ва янгиланишлар ўз ифодасини топмоқда.
Жамшид НОРҚОБИЛОВ (сурат),ЎзА
