Европанинг иқтисодий дарвозалари: қайси портлар энг кўп юк қабул қилмоқда?
2024 йил якунларига кўра, Европа Иттифоқи портлари орқали 3,4 миллиард тонна юк ўтган, бу жаҳон денгиз савдосининг қарийб 26 фоизига тенг. Рейтингда Нидерландиянинг Роттердам порти 397,3 миллион тонна билан мутлақ етакчилик қилган бўлса, Бельгиядаги Антверпен-Брюгге 243,7 миллион тонна билан иккинчи ўринни эгаллаган.
Германиянинг Гамбург порти 97 миллион тонна натижа билан учинчи бўлган. Кейинги ўринларда Испаниянинг Альхесирас – 81,5 миллион, Нидерландиянинг Амстердами – 78,8 миллион тонна юк айланмаси билан жойлашган. Франциянинг HAROPA тизими 76,6 миллион тонна, Польшадаги Гданьск эса 71 миллион тонна кўрсаткич қайд этган.
Мамлакатлар кесимида Нидерландия яна олдинда: унинг барча портлари 538,1 миллион тонна юк қабул қилган ва жўнатган. Италия 488,6 миллион тонна билан иккинчи, Испания 486 миллион тонна билан учинчи ўринни олган.
ЕИ давлатлари ва Европа эркин савдо уюшмаси ўлкалари ҳам ҳисобга олинганда, Туркия 524,7 миллион тонна билан иккинчи поғонага кўтарилади, Норвегия эса 212,1 миллион тонна билан саккизинчи ўриндан жой олади. Бу рақамлар денгиз йўллари Европа иқтисодиёти учун оддий транспорт тармоғи эмас, балки савдо, таъминот ва стратегик барқарорликнинг асосий таянчларидан бири эканини кўрсатмоқда.
Мусулмон Зиё, ЎзА
