Европа Иттифоқи Россияга босимни кучайтирмоқда
Брюсселда бўлиб ўтган саммитда Европа Иттифоқи давлатлари Россияга қарши жорий этилган санкцияларни илк марта 6 ойга эмас, балки бир йил муддатга узайтиришга келишиб олди, деб хабар берди DW нашри
Маълум бўлишича, Венгриянинг қарши чиқмагани сабабли бу қарор қабул қилинган. Аввалги бош вазир Виктор Орбан санкцияларни узайтириш масаласини бир неча бор тўсиб келган эди. Май ойида лавозимга киришган янги бош вазир Петер Мадьяр эса санкцияларни қўллаб-қувватлади.
Европа Иттифоқи Кенгаши ушбу қарорни яқин ҳафталарда расман тасдиқлаши кутилмоқда.
Саммитда қабул қилинган Украина ҳақидаги декларацияни ЕИнинг барча 27 аъзоси маъқуллади. Ҳужжатда Европа Иттифоқи Россияга босимни янада кучайтириш, унинг ҳарбий иқтисодиётини заифлаштириш ва Москвани мазмунли тинчлик музокараларига жалб қилиш ниятида экани қайд этилган.
Шунингдек, Россиянинг энергия ресурслари экспортидан оладиган даромадларини қисқартириш ва санкциялар пакетини тезроқ қабул қилиш муҳимлиги таъкидланган.
21-санкциялар пакетининг аниқ мазмуни ҳозирча маълум эмас. Оммавий ахборот воситаларида тарқалган маълумотларга кўра, унда Украинадаги урушда қатнашган россиялик ҳарбийларга Европа Иттифоқига кириш тақиқланиши мумкин.
Янги пакет энергетика, молия, савдо ва ҳатто балиқчилик соҳасини ҳам қамраб олиши кутилмоқда.
<iframe width="650" height="420" src="https://www.youtube.com/embed/4TGe9SVib2k" title="Yevropa Ittifoqi Rossiyaga bosimni kuchaytirmoqda" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>К.Бекжонов, ЎзА
