Eron Tramp tahdidlarini "hollivudcha xomxayollar" deb baholadi
AQSH prezidenti Donald Trampning Eronni "tosh davriga qaytarish" haqidagi qat’iy bayonoti Tehronning jiddiy javobiga uchradi. Bu keskin ritorika mintaqaviy xavfsizlikni xavf ostiga qo‘yadimi?
Qo‘shma Shtatlar yetakchisi Donald Tramp tomonidan Eronni “tosh davriga qaytarish” haqidagi keskin bayonot berilgach, Tehron rasmiylari bunga tanqidiy javob qaytardi. Eron tomoni bu kabi chiqishlarni jiddiy siyosiy signal emas, balki “hollivudcha xomxayollar” sifatida baholamoqda.
Xususan, Eron Islom inqilobi qo‘riqchilari korpusi (IIQK) vakillari Oq uy rahbarining ritorikasini keskin qoralab, bunday tahdidlar mintaqaviy xavfsizlikni yanada izdan chiqarishini ta’kidladi. IIQKning havo kuchlari qo‘mondoni Majid Musaviy o‘z bayonotida AQSH rahbariyatini tanqid qilib, bunday siyosat amerikalik harbiylar hayotini xavf ostiga qo‘yayotganini urg‘uladi. Shuningdek, u tarixiy qiyos keltirib, nisbatan qisqa davlat tarixi bilan ming yillik sivilizatsiyaga tahdid qilish holatini keskin kinoya bilan qayd etdi.
Eron prezidenti ma’muriyati vakili Mehdi Tabataboiy ham bu mavzu yuzasidan fikr bildirib, “tosh davri” haqidagi iborani mutlaqo asossiz deb atadi. Uning ta’kidlashicha, Eron sivilizatsiyasi chuqur tarixiy ildizlarga ega bo‘lib, bunday tahdidlar haqiqiy vaziyatdan yiroq. Aksincha, u AQSHning o‘zi global siyosiy keskinlikni kuchaytirayotganini bildirib, bu kabi yondashuv xavfli oqibatlarga olib kelishi mumkinligini ta’kidladi.
Avvalroq, Tramp Eron yadroviy kelishuv shartlariga rozi bo‘lmagan taqdirda, mamlakatning energetika infratuzilmasiga keng ko‘lamli zarba berilishi mumkinligini aytgan edi. Ushbu bayonotda Eronni elektr energiyasidan butunlay mahrum qilish orqali iqtisodiy va ijtimoiy tizimni izdan chiqarish ehtimoli tilga olingan.
F.Yaxshiboyeva, O‘zA
