Энергетика тармоғидаги инвесторлар кенгаши йиғилиши қандай мақсадга йўналтирилган? (+видео)

Вазир фикри

Иқтисодий барқарорлик ва халқ фаровонлиги, аввало, ишончли ҳамда узлуксиз энергия таъминотига таянади.

Президент Шавкат Мирзиёев ёқилғи-энергетика тармоғидаги ислоҳотларни жадаллаштириш ва соҳанинг инвестициявий жозибадорлигини ошириш юзасидан сармоядорлар билан очиқ мулоқот ўтказди.Тадбирда 200 дан зиёд хорижий ёқилғи-энергетика компаниялари вакиллари иштирок этди.

Ўзбекистон Республикаси энергетика вазири Шерзод Хўжаев соҳадаги самарали лойиҳалар, сармоядорларга яратилаётган имкониятлар ҳақида ўз фикрлари билан ўртоқлашди.

–Ёқилғи-энергетика тармоғидаги инвесторлар кенгашининг йиғилишидан кўзланган асосий мақсад, давлат ва сармоядорлар ўртасида очиқ ҳамда натижага йўналтирилган мулоқотни шакллантиришдир. Бу платформа инвесторларни қийнаётган муаммоларга тезкор ечим топиш, амалдаги лойиҳаларни жадаллаштиришнинг стандарт механизмларини ишлаб чиқиш ва янги истиқболли ташаббусларни илгари суришга хизмат қилади.

Бугун биз мана шу тадбир доирасида тўрт миллиард етти юз йигирма миллион долларлик битимларни имзоладик. Тез кунда бу лойиҳаларнинг қурилишига старт берилади.

Бундан ташқари, йиғилишда Президентимиз томонидан яқинда имзоланган фармоннинг мазмун-моҳиятига алоҳида тўхталиб ўтилди. Мазкур ҳужжат ёқилғи-энергетика комплексида инвестиция лойиҳаларини амалга оширишнинг янги тартибини белгилаб, инвесторлар учун қўшимча қулайлик ва енгилликлар яратади. Агар сармоядорлардан қонунчиликни янада такомиллаштириш бўйича қўшимча таклифлар келиб тушса, келгуси фаолиятимизни албатта ушбу тавсиялар асосида ташкил этамиз.

Видеоси қуйида:

Абдулазиз РУСТАМОВ,

Ёқубжон МЕЛИБОЕВ (+видео),

ЎзА