Булутлар билан бўйлашган шаҳар: Куала-Лумпурдан фоторепортаж
Дунёдаги айрим шаҳарлар дастлабки кузатувлардан сўнг ўзини намоён этса, бошқаларини англаш учун эса унинг кўчалари бўйлаб сайр қилиш, тонгини қарши олиш, тунги чироқларини томоша қилиш керак бўлади. Куала-Лумпур ана шундай шаҳарлардан бири. Малайзия пойтахтини бир қарашда англаб бўлмайди. Бу ерда ўтмиш ва бугун, шарқона вазминлик ва замонавий ҳаёт суръати уйғунлашиб, шаҳарнинг ўзига хос қиёфасини акс эттиради.
Осмонўпар баланд бинолар, серқатнов кўчалар бўйидаги ям-яшил майдонлар, тўсатдан бошланиб, кутилмаганда тинадиган ёмғир – буларнинг барчаси Куала-Лумпурнинг кундалик манзараси.
Эътиборли жиҳати, бу ерда бир неча дақиқа тўхтаб, атрофга назар ташласангиз, вақтнинг икки соҳили ўртасида тургандай бўласиз. Бир тарафда – ўтмиш сукути, иккинчи тарафда – шиддат билан ҳаракатланаётган XXI аср.
Жаҳонга машҳур Петронас эгизак миноралари пойтахтнинг замонавий қиёфасини белгилаб берган иншоотлардан. Кундузи улар қуёш нурида товланиб турса, оқшомда бутунлай бошқача манзара пайдо бўлади. Минглаб чироқлар билан ёритилган икки улкан минора қоронғу осмонга чизилган нурли нақшни эслатади гўё.
[gallery-https://uza.uz/uz/collection/31592]
Шаҳарнинг яна бир ўзига хос жиҳати – унинг ранг-баранглиги. Куала-Лумпурда малай, хитой ва ҳинд маданиятлари муштарак ҳолда бетакрор муҳит ҳосил қилган. Қайсидир кўчада масжиддан азон овози эшитилса, сал нарида хитой ибодатхонасининг безаклари кўзга ташланади. Яна бир ҳудудда эса ҳинд миллий либослари ва таомлари билан юзлашасиз. Умуман олганда, ушбу мегаполис кентни суратларда акс эттириш мумкин, аммо унинг ҳақиқий руҳини англаш учун эса Куала-Лумпурни кўриш, кезиш ва ҳис қилиш керак бўлади.
Ўткир Алимов, ЎзА
Куала – Лумпур, Малайзия
