Астманинг оғир шакли умрни қисқартириши мумкин
Каролинска институти олимлари ўтказган янги тадқиқотга кўра, астманинг оғир шакли эрта ўлим хавфини қарийб икки баравар ошириши мумкин. Тадқиқот натижалари “European Respiratory Journal”да эълон қилинган.
Мутахассислар 11 мингдан ортиқ астма билан касалланган беморларнинг маълумотларини таҳлил қилиб, уларни 20 йил давомида кузатган. Натижаларга кўра, оғир астма билан оғриган беморлар орасида ўлим кўрсаткичи сезиларли даражада юқори бўлган.
Олимларнинг таъкидлашича, астманинг ўзи камдан кам ҳолларда бевосита ўлимга олиб келади, бироқ унинг оғир шакли организмда тизимли яллиғланиш жараёнларини кучайтиради. Бу эса юрак-қон томир касалликлари, тромбоз, миокард инфаркти ва инсульт хавфини ошириши мумкин.
Бундан ташқари, оғир астма беморларида бошқа сурункали ва онкологик касалликлар ҳам кўпроқ учраши қайд этилган. Мутахассислар фикрича, айнан шу ҳамроҳ касалликлар ўлим кўрсаткичининг ошишига асосий сабаб бўлиши мумкин.
Тадқиқотчилар оғир астма нисбатан кам учрашини — беморларнинг тахминан 3–8 фоизини ташкил этишини таъкидласа-да, айнан шу гуруҳ энг қатъий тиббий назорат ва мунтазам даволанишни талаб қилишини урғуламоқда.
<iframe width="560" height="315" src="https://www.youtube.com/embed/PJ-lf1bFSYE?si=8xfNDzzMSpzDeT_n" title="YouTube video player" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>Мадинабону Насриева, Улуғбек Тўхтаев, ЎзА
