Астанада Өзбекстан мен Қазақстан туризм форумы өтті
Қазақстанның бас қаласы Астанада «Өзбекстан мен Қазақстан: стратегиялық серіктестік және жаңа туризм хабтарын қалыптастыру» тақырыбында туризм форумы өтті.
Туризм саласының өкілдерін біріктірген форумға екі елдің мемлекеттік органдары, дипломатиялық корпусы, әуе компаниялары, туроператорлары, қонақүй бизнесі және бұқаралық ақпарат құралдарының 300-ге жуық өкілі қатысты.
Қатысушылар негізінен тікелей әуе қатынасын кеңейтуге, жаңа туристік бағыттарды дамытуға және көлік байланысын жақсартуға назар аударды. Қазіргі уақытта екі ел арасында аптасына 50-ден астам тұрақты рейс орындалады, ал соңғы бір жылда алты жаңа бағыт ашылды.
Қонақ үй индустриясы, медицина және санаторий-курорттық емдеу, зиярат және гастрономиялық туризм салаларындағы ынтымақтастықтың перспективаларына да ерекше назар аударылды.
Сонымен қатар қатысушылар екі елдің тарихи-мәдени мұрасы мен гастрономиялық дәстүрлерін үшінші елдердің нарықтарында бірлесіп ілгерілету мүмкіндіктерін атап өтті.
Кездесу аясында әуе компаниялары, қонақ үй бизнесі және туризм саласының өкілдерінің қатысуымен үш панельдік сессия өтті. Өзбекстанның туристік әлеуеті таныстырылды: Астана төрінде «Nadi.uz» брендінің ұлттық және заманауи киімдер топтамасы, сондай-ақ дәстүрлі қолданбалы өнер көрмесі ұйымдастырылды.
Форум қорытындысы бойынша туризм және бизнес қауымдастығының өкілдері әуе қатынасын кеңейту, бірлескен туристік бағыттар мен өнімдер жасау, қонақүй инфрақұрылымын дамыту, сондай-ақ Өзбекстанның туристік әлеуетін Қазақстан нарығында ілгерілету бағытындағы жұмысты жалғастыруға келісті.
Айта кетейік, Қазақстан мен Өзбекстан арасындағы туризм саласындағы ынтымақтастық кейінгі жылдары жаңа бағыттармен толығып келеді. Екі ел туристік байланыстарды кеңейтіп, өзара сапарлар санын арттыруға және бірлескен туристік өнімдерді дамытуға мүдделі екенін ескеріп, алдағы уақытта екі елдің байланысы бұдан әрі дами түспек.
