Парламент қуйи палатаси мажлисида давлат хизматларини кўрсатиш тизимини янада такомиллаштиришга қаратилган қонун лойиҳаси иккинчи ўқишда моддама-модда кўриб чиқилди.

Қайд этилганидек, ушбу қонун лойиҳасини биринчи ўқишда муҳокама қилиш давомида депутатлар томонидан бир қатор таклифлар берилган эди. Уни иккинчи ўқишга тайёрлаш жараёнида барча таклифлар чуқур таҳлил қилиниб, улар асосида ҳужжат матни маромига етказилди.

Хусусан, “Архив иши тўғрисида”ги қонунда архив ҳужжатининг электрон нусхаси, идоравий архив, электрон архив тушунчаларига берилган таърифлар аниқлаштирилди.

Қонун лойиҳаси электрон архивни ташкил этиш тартиби ва ўзига хос талабларини белгиловчи алоҳида модда билан тўлдирилди. Унда электрон архивни ташкил этиш учун электрон шаклдаги архив ҳужжатини унинг асл архив ҳужжати билан бир хиллигини таъминлаш, электрон архив ҳужжатларини қидириш, бошқариш ва ишлов бериш имкониятининг мавжудлиги, электрон архив тизимининг хавфсизлиги ва киберхавфсизлик талабларига риоя этилиши зарурлиги тўғрисидаги ҳамда бошқа талаб ва қоидалар белгиланмоқда.

Бундан ташқари, қонун лойиҳаси билан лицензия ва рухсат бериш тартиб-таомилларини соддалаштиришга оид киритилган нормаларга аниқлаштирувчи ва таҳририй тузатишлар киритилди.

Қонун лойиҳасидаги нормалар аҳоли ва тадбиркорлик субъектлари учун бизнесни бошлашда ортиқча тартиб-таомиллардан ўтиш жараёнларини бартараф этиш, архив ташкилотларининг ҳуқуқий мақоми ва фаолиятини тартибга солиш, архив ҳужжатларини электрон шаклда сақлашнинг асосларини такомиллаштиришга хизмат қилади.  

Моддама-модда муҳокамалардан сўнг қонун лойиҳаси депутатлар томонидан қабул қилиниб, Сенатга юборилди.

Муҳтарама Комилова,

ЎзА