АҚШ ва Эрон тинчлик битимини имзолашга келишди (+видео)
АҚШ ва Эрон ўртасидаги тинчлик келишуви 19 июнь куни Швейцарияда имзоланади, деб хабар берди DW нашри.
Бу ҳақда воситачи сифатида иштирок этаётган Покистон бош вазири Шаҳбоз Шариф маълум қилган. Келишув ҳақидаги маълумотни АҚШ президенти Дональд Трамп ҳам тасдиқлади.
Шаҳбоз Шариф якшанба, 14 июнь куни Х ижтимоий тармоғидаги саҳифасида чиқиш қилиб, АҚШ ва Эрон 19 июнь куни Швейцарияда тинчлик келишувини имзолашини маълум қилди.
У ҳар икки томонга можарони дипломатик йўл билан ҳал этаётгани учун миннатдорлик билдириб, Қатарга воситачилик учун, шунингдек, Саудия Арабистони ва Туркияга бу борадаги улкан ҳиссаси учун ташаккур айтди.
АҚШ президенти Дональд Трамп ўзининг ижтимоий тармоғида Эрон билан тинчлик келишуви энди тўлиқ тузилганини маълум қилди.
Шу билан бирга, у АҚШ ҳарбий-денгиз кучлари томонидан Ҳурмуз бўғозида ўрнатилган блокадани бекор қилишни буюрди.
АҚШ вице-президенти Жеймс Ди Вэнс келишувни Женева шаҳрида имзолаш маросимида қатнашишни режалаштираётганини билдирди. Унинг сўзларига кўра, учрашувда Трампнинг ўзи ҳам иштирок этиши мумкин.
Шаҳбоз Шариф ўз баёнотида АҚШ ва Эрон барча фронтларда, жумладан Ливанда ҳам ҳарбий ҳаракатларни дарҳол ва батамом тўхтатиш ҳақида келишиб олганини таъкидлади.
<iframe width="650" height="420" src="https://www.youtube.com/embed/X_uCsUQx2xs" title="AQSH va Eron tinchlik bitimini imzolashga kelishdi" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>Кенжа Бекжонов, Анвархўжа Аҳмедов, ЎзА
