Анвар Анваровдан навбатдаги рекорд
Хорватиянинг Загреб шаҳридаги нуфузли турнирда ўзбекистонлик Анвар Анваров тарихий натижа қайд этди. У енгил атлетика бўйича олтин медални қўлга киритиб, янги рекорд ўрнатди.
Хорватиянинг Загреб шаҳрида енгил атлетика бўйича нуфузли «Boris Hanžeković Memorial» турнири бўлиб ўтди. Мазкур мусобақада Ўзбекистон шарафини ҳимоя қилган Анвар Анваров узунликка сакраш баҳсларида 8,29 метр натижа қайд этиб, олтин медални қўлга киритди.
Бу натижа орқали ҳамюртимиз Ўзбекистоннинг янги миллий рекордини ўрнатди. Шу тариқа Анвар Анваров ўзига тегишли бўлган аввалги — 8,25 метрлик рекордни ҳам янгилади. Эслатиб ўтамиз, мазкур натижа у томонидан 2025 йил 12 июль куни Финляндияда қайд этилган эди.
Загребдаги мусобақада сербиялик Лука Божич 8,23 метр натижа билан иккинчи, ямайкалик Тажай Гейл эса 8,18 метр билан учинчи ўринни эгаллади.
Маълумот учун, “World Athletics Continental Tour Gold” тоифасига кирувчи турнирлар жаҳон енгил атлетикаси тақвимидаги энг нуфузли мусобақалардан бири ҳисобланади ва унда дунёнинг етакчи спортчилари иштирок этади.
Жавоҳир Тошхўжаев,
ЎзА
