Амударёда хотин-қизлар бандлигига эътибор
Қорақалпоғистон Республикаси Амударё туманида хотин-қизлар бандлигини таъминлаш, уларни касб-ҳунарга ўргатиш ва тадбиркорликка жалб этиш борасида амалий ишлар олиб борилмоқда. Хусусан, туманнинг Алишер Навоий номли маҳалласида фаолият юритаётган тикувчилик кооперацияси хотин-қизлар учун доимий даромад манбаига айланган.
Тадбиркор Шарофат Йўлдошева раҳбарлик қилаётган мазкур кооперацияда 30 нафарга яқин хотин-қиз иш билан таъминланган. Бу ерда тайёрланаётган турли кийим-кечаклар ички бозорга етказиб берилиши билан бирга, қўшни Қозоғистонга ҳам экспорт қилинмоқда.
Кооперацияда ходимлар учун зарур меҳнат шароитлари яратилган. Замонавий тикув ускуналари ёрдамида харидорлар талабига мос маҳсулотлар ишлаб чиқарилмоқда.
Тадбиркорнинг таъкидлашича, фаолият кўламини кенгайтириш мақсадида туманнинг “Чойкўл” ва “Тўлқин” овул фуқаролар йиғинлари ҳудудларида ҳам кооперация филиаллари ташкил этилган. Натижада олис ҳудудларда истиқомат қилувчи хотин-қизлар учун қўшимча иш ўринлари яратилмоқда.
Шунингдек, Ш. Йўлдошева хотин-қизларни касбга ўргатишга ҳам алоҳида эътибор қаратган. Жумладан, Жайхун ва Дўрмон маҳаллаларида хотин-қизларга тикувчилик ҳунари ўргатилиб, уларнинг амалий кўникмалари оширилмоқда.
[gallery-32052]
Келгусида кооперация фаолиятини янада кенгайтириш, туманнинг бошқа маҳаллаларида ҳам хотин-қизлар бандлигини таъминлашга қаратилган ташаббусларни амалга ошириш режалаштирилган.
Мақсад ҲАБИБУЛЛАЕВ (сурат), ЎзА
