Академик эшкак эшувчиларимиз Осиё ўйинларига қизғин тайёргарлик кўрмоқда
Айни кунларда Ўзбекистон академик эшкак эшиш терма жамоаси аъзолари Литванинг Тракай шаҳрида халқаро ўқув-машғулот йиғинида иштирок этмоқда.
Спортчиларимиз мазкур йиғин доирасида бошқа давлатлар терма жамоалари вакиллари билан биргаликда машғулотлар олиб бориб, жорий йил Аичи-Нагоя шаҳарларида ўтказиладиган Осиё ўйинларига қизғин тайёргарлик кўрмоқда.
Мураббийлар штаби машғулотлар жараёнида спортчиларнинг техник маҳоратини такомиллаштириш, ҳаракатлар уйғунлиги ва тезлигини оширишга алоҳида эътибор қаратмоқда.
Терма жамоамиз таркибидан Шаҳбоз Холмурзаев, Собир Сафаралиев, Шаҳзод Нурматов, Жамолбек Тўрғунов, Алишер Турдиев, Максим Голубев, Дилшоджон Худойбердиев, Давржон Давронов, Фирдавс Охунов, Райҳон Сатторова, Айдана Сметуллаева, Фазлиддин Каримов, Павел Сорин, Меҳрож Маматқулов, Анна Аксёнова, Мария Сергеева ва Анна Пракaтен ўрин олган.
Эслатиб ўтамиз, 2022 йилги Осиё ўйинларида академик эшкак эшиш бўйича Ўзбекистон терма жамоаси 2 та олтин, 4 та кумуш ва 1 та бронза медалини қўлга киритган эди. Эндиликда спортчиларимиз мазкур натижани янада яхшилаш, қитъа ўйинларида муносиб иштирок этиб, юртимиз делегацияси медаллар жамғармасига муносиб ҳисса қўшишни мақсад қилган.
Жавоҳир Тошхўжаев,
ЎзА
