500 фоиз чегирма — Трампча математика

АҚШ Президенти Дональд Трамп Флоридадаги чиқиши давомида махсус тестдан аъло даражада ўтганини айтди. У оддий ҳайвонларни ажратишдан тортиб, арифметик мисолларгача намуна келтириб, сўнгги саволлар жуда қийин бўлгани ва барчасига тўғри жавоб берганини таъкидлади.

Президент келтирган мисоллардан баъзилари ижтимоий тармоқда фаол муҳокама қилиниб, жуда кўп фойдаланувчилар машқнинг қийинлигига шубҳа билдирган.

Масалан, Трамп нархдан 400-800 фоизгача чегирма ҳақида ҳам гапирган эди. Мутахассислар эса "100 фоиз чегириш миқдор нолга тушишини англатади, демак 500 ёки 800 фоизлик чегирма математика нуқтаи назаридан мумкин эмас"дея эътироз билдирган. Мазкур баёнот сиёсатчилар томонидан ҳам танқид қилинди. Жумладан, сенатор Элизабет Уоррен ва Калифорния губернатори Гэвин Ньюсом баҳсни киноя билан изоҳлади.

Ушбу ҳолат оммавий чиқиш чоғида айтилган рақам ёки фактнинг аниқлиги ўта муҳимлигини  яна бир бор исботлади.

Мусулмон Зиё, ЎзА