Зеленский БМТда: Путин уруш ғоясини дунёга ёймоқда (+видео)
– Россия Президенти Владимир Путин уруш ғоясини бутун дунёга тарқатаётган манба, – деди Украина Президенти Владимир Зеленский Нью-Йоркда БМТ Бош Ассамблеяси йиғилишида. – Путиннинг ҳаракатланишига йўл қўймаслик, бундай ёвузликни янада кенгроқ тарқатишига имкон бермаслик керак. Бу ҳақда DW хабар берган.
Киев Россия энергетика тизимига зарба бериш билан таҳдид қилди. Зеленскийнинг айтишича, Россия тарихида биринчи марта мамлакатнинг “ғурури” ҳисобланган нефт саноати сўнгги кучини сарфламоқда.
– БМТ Хавфсизлик кенгашида доимий ўринга эга, нефть экспорти билан ғоят фахрланадиган мамлакат учун бундан-да таҳқирли мағлубиятни тасаввур қилиш қийин, – деди Украина етакчиси.
Унинг таъкидлашича, нефть Киев учун мақсад эмас. Бензин, дизель ёнилғиси, завод ва портлар ҳам зарба бериш учун асосий нишон ҳисобланмайди. Мақсад – Россиянинг урушни молиялаштириш ва чўзиш имкониятини чеклаш.
Зеленский руслар урушни тугатишга тайёрлигига шубҳа билдириб, Путинни тинчлик излаш ўрнига можаро кўламини кенгайтиришда давом этаётган раҳбар сифатида кўрсатди. Шунингдек, украиналикларни яна бир оғир қиш кутаётганидан огоҳлантирди. Москва ҳужумига жавоб тариқасида иссиқлик таъминоти тизими ва энергетика инфратузилмасига яна зарба берилиши мумкинлигини айтди:
– Украиналиклар бу қиш биз учун жуда оғир келишини тушунади, аммо бизда бу қишни РФ учун ҳам оғриқли қилишдан бошқа чора йўқ.
Зеленский январь-август оралиғида Россия Қуролли кучлари жанг майдонида 248 964 ҳарбий йўқотганини эслатди. Қўшимча қилинишича, рус армияси сафида, жанг майдонида ҳалок бўлаётганлар орасида 47 давлат фуқаролари бор. Президент огоҳлантиришича, келаси йилдаёқ фронт учун қарорни нафақат инсонлар, балки сунъий интеллект ҳам қабул қила бошлаши эҳтимоли яқин.
– Биз ўша нуқтага етиб бормасдан олдин тинчликка эришишимиз керак, – деди у.
Айни пайт Россия ташқи ишлар вазири Сергей Лавров БМТ минбаридан туриб жангда танаффус бўлмаслигини билдирди.
Кенжа Бекжонов, Искандар Исматов, (видео) ЎзА
