Ёшлар тақдирига дахлдор масала
Гиёҳвандлик ва психотроп моддаларнинг ноқонуний айланмасига қарши курашиш бугун фақат ҳуқуқни муҳофаза қилувчи органлар олдидаги вазифа эмас. Бу – миллат генофонди, ёшлар келажаги ва жамият хавфсизлиги билан чамбарчас боғлиқ масала. Шу боис мамлакатимизда бу иллатга қарши курашиш жазо муқаррарлигини таъминлаш билан чекланмай, аввало, унинг илдизини қуритишга қаратилган профилактик чора-тадбирларни кучайтириш орқали амалга оширилмоқда.
Айнан шу мақсадда Ўзбекистон Республикаси Президенти Администрацияси ҳузуридаги Наркотиклар ва ўқотар қуролларни назорат қилиш агентлиги ишчи гуруҳи Жиззах давлат педагогика университетида наркожиноятларнинг олдини олиш ҳамда психотроп моддаларнинг ноқонуний айланмасига муддатидан олдин барҳам бериш юзасидан ўрганиш ишларини олиб борди.
Ўрганишлар оддий танишув билан чекланмади. Университетда йўлга қўйилган профилактика тизими самарадорлиги ҳар томонлама таҳлил қилиниб, профилактик мурожаат қутиларининг =олати, профилактика инспекторлари томонидан амалга оширилаётган ишлар, шунингдек, Ёшлар масалалари ва маънавий-маърифий ишлар йўналишида 2025–2026 ўқув йили давомида бажарилган чора-тадбирларнинг натижадорлиги атрофлича баҳоланди. Бу орқали мавжуд тажрибанинг самарали жиҳатлари билан бирга, янада такомиллаштиришни талаб этадиган йўналишлар ҳам аниқлаб олинди.
Таҳлиллар шуни кўрсатадики, ёшларни таҳдидлардан асрашда таъсирчан профилактика, ҳуқуқий тарғибот ва манзилли ёндашув энг муҳим омиллардан ҳисобланади. Шу нуқтаи назардан, агентлик мутахассислари томонидан янги 2026–2027 ўқув йилида мазкур йўналишда амалга оширилиши лозим бўлган устувор вазифалар юзасидан масъулларга тегишли тавсия ҳамда амалий маслаҳатлар берилди. Хусусан, профилактика ишларини янада манзилли ташкил этиш, хавф омилларини эрта аниқлаш ва ёшлар билан тизимли мулоқотни кучайтиришга алоҳида эътибор қаратилди.
Жиззах давлат педагогика университетида ўтказилган мазкур ўрганиш ҳам ана шу эзгу мақсадларга хизмат қилади. Зеро, гиёҳвандликка қарши энг самарали кураш унинг оқибатларини бартараф этишдан эмас, балки ҳар бир ёшнинг онгида унга қарши мустаҳкам иммунитетни шакллантиришдан бошланади.
Абдужалол Қаюмов, ЎзА мухбири
