Япония кўмир станцияларини тиклаяпти
Яқин Шарқда давом этаётган ҳарбий-сиёсий зиддият глобал энергия бозорини издан чиқарди. Натижада Япония ҳукумати мамлакат энергия хавфсизлигини таъминлаш учун кўмир электр станцияларидан фойдаланишга қўйилган чекловни юмшатишга мажбур бўлди.
2026 молиявий йилдан бошлаб илгари экология талаби ва паст самарадорлик сабаб фаолияти тўхтатилган кўмир станциялари яна электр таъминоти тизимига жалб қилинади. Бу қадам энергия етишмовчилигини камайтиришга қаратилган. Бундай кескин чора бир неча ташқи омил билан боғлиқ: Ҳурмуз бўғози ёпилиши, Қатардаги йирик суюлтирилган газ заводлари ишламаётгани ва хусусий компаниялар ўртасида газ тақсимотини марказлашган ҳолда назорат қилиш эҳтиёжи юзага келгани. Бош вазир Санаэ Такаичининг фикрича, кўмир станцияларини тўлиқ қувватда ишлатиш ва атом энергетикасини тиклаш орқали мамлакат Ҳурмуз орқали келадиган газнинг тахминан 40 фоизини қоплаш имконига эга. Бинобарин, мазкур ташаббус Япониянинг “яшил энергия”га ўтиш стратегиясидан вақтинча чекиниши сифатида ҳам баҳоланмоқда. Экспертлар кўмирга қайтиш узоқ муддатли экологик мақсад – 2050 йилгача “чиқиндисиз” даражага эришиш режасини хавф остида қолдириши мумкинлигини таъкидламоқда.
Ф. Яхшибоева, ЎзА
