Велотрек: Сергей Ростовцев Венгрияда олтин ва кумуш медални қўлга киритди
Венгрияда велотрек бўйича ўтказилган «IV. Budapest GP» халқаро мусобақасида Ўзбекистон миллий терма жамоаси аъзоси Сергей Ростовцев икки марта шоҳсупадан жой олди.
«Class 2» тоифасига кирувчи нуфузли мусобақанинг «point race» дастурида ҳамюртимиз 116 очко жамғариб, барча рақибларини ортда қолдирди ва олтин медалга сазовор бўлди. 30 километр масофага мўлжалланган, 150 айланадан иборат баҳсда Ростовцев жисмоний ва тактик маҳоратини намойиш этди.
Спортчимиз кун давомидаги яна бир йўналиш — «scratch» пойгасида ҳам муваффақиятли иштирок этди. Унда Сергей Ростовцев канадалик Дилан Бибичдан кейин маррага иккинчи бўлиб етиб келиб, кумуш медални қўлга киритди. Польша вакили Даниэль Станишевски эса учинчи ўринни эгаллади.
Шу тариқа, 11–12 август кунлари Венгрияда ўтказилган «IV. Budapest GP» мусобақасида Ўзбекистон миллий терма жамоаси вакиллари 2 та олтин ва 1 та кумуш медалга эга бўлди. Бундан аввал Никита Светков мусобақанинг яна бир йўналишида ғолибликни қўлга киритган эди.
Жавоҳир Тошхўжаев, ЎзА
