Велоспортчиларимиз Малайзияда муваффақиятга эришмоқда
Шу кунларда Малайзиянинг Нилай шаҳрида велоспортнинг трек йўналиши бўйича ўтказилаётган "ASEAN TRACK SERIES" мусобақасида миллий терма жамоа аъзолари муносиб натижаларга эришмоқда.
Ҳамюртларимиз Малайзия турнирининг "омниум" дастурида 1-ўринни эгаллагани аҳамиятли бўлди.
Ортда қолган баҳсларда терма жамоамизга олтин медални тақдим этган Сергей Ростовцев бу сафар ҳам ўзини кўрсатди. Велопойгачимиз "scratch" ва "elemination" дастурларида барча рақибларини ортда қолдириб, етакчиликка эришди. Мазкур натижа орқали Ростовцев учта олтин медаль соҳибига айланди.
Эслатиб ўтамиз, Малайзияда ўтаётган турнир спортчиларимизга жорий йил март ойида Австралияда трек бўйича бўладиган жаҳон кубогига йўлланмаларни тақдим этиши билан бирга, халқаро рейтинг очколарини беради.
11 январга қадар давом этадиган халқаро турнирнинг илк босқичида 3 та олтин ва 1 та бронза медалини қўлга киритган терма жамоамиз аъзолари эртадан иккинчи босқич баҳсларида ўз омадларини синовдан ўтказади.
Т.Рўзиев,
ЎзА
