Ватанга хизмат — юксак шараф
Жиззахда Ватан тараққиёти, халқ фаровонлиги ва юрт ободлиги йўлида сидқидилдан меҳнат қилаётган фидойи инсонларга юксак эҳтиром кўрсатилди. Вилоят ҳокимлигида мамлакатимиз мустақиллигининг 35 йиллиги муносабати билан давлат мукофотлари ҳамда “Ўзбекистон Республикаси Мустақиллигининг 35 йиллиги” эсдалик нишонини тантанали топшириш маросими бўлиб ўтди.
Унда йиллар давомида ўз касбига садоқат билан хизмат қилиб, жамият ҳаётида фаол иштирок этган, юрт тараққиётига муносиб ҳисса қўшган бир гуруҳ жиззахликлар шарафланди.
Тантанали маросимда вилоят ҳокими Улуғбек Мустафоев иштирок этиб, мукофотларни ўз эгаларига топширди ва уларни Мустақиллигимизнинг 35 йиллиги билан самимий муборакбод этди.
Таъкидланганидек, бундай юксак эътироф замирида инсон меҳнатига берилган оддий баҳо эмас, балки Ватанга садоқат, касбга фидойилик ва эл манфаати йўлидаги ташаббусларга билдирилган юксак ишонч мужассам. Зеро, мамлакат тараққиётини рақамлар ва бунёдкорлик билан бир қаторда, ана шу ўз ишига виждонан ёндашадиган, юрт тақдирига дахлдорлик ҳисси билан яшайдиган инсонлар белгилайди.
Мустақиллик йилларида мамлакатимизда амалга оширилаётган кенг кўламли ислоҳотлар натижасида иқтисодиёт, таълим, тиббиёт, тадбиркорлик, саноат ва замонавий инфратузилма соҳаларида салмоқли ўзгаришлар юз берди. Бу жараёнларнинг ҳар бирида ўз меҳнати, билими ва ташаббуси билан ҳисса қўшаётган инсонларни рағбатлантириш эса жамиятда меҳнатга ҳурмат ва дахлдорлик туйғусини янада мустаҳкамламоқда.
Шу маънода, Ўзбекистон Республикаси Президентининг 2026 йил 25-июндаги тегишли Фармонига мувофиқ таъсис этилган “Ўзбекистон Республикаси Мустақиллигининг 35 йиллиги” эсдалик нишони ҳам ана шундай фидойи юртдошларга билдирилаётган эътиборнинг ёрқин ифодасидир.
Тақдирланганлар ўзларига кўрсатилган юксак ишонч ва эътироф учун миннатдорлик билдириб, бу мукофотни янги меҳнат марралари сари ундайдиган катта масъулият сифатида қабул қилганини таъкидлашди. Улар мамлакат тараққиёти ва халқ фаровонлиги йўлида бундан буён ҳам сидқидилдан меҳнат қилишга тайёр эканини билдиришди.
Маросимда давлат мукофотлари ва эсдалик нишонининг ҳар бири ортида инсоннинг йиллар давомидаги меҳнати, изланиши, ташаббуси ва элга хизмат қилишдек эзгу интилиши борлиги алоҳида қайд этилди.
Мустақиллик байрами арафасидаги бундай эътирофлар юрт равнақига ҳисса қўшаётган ҳар бир инсон учун катта маънавий рағбатдир. Зеро, меҳнат қадрланган жойда масъулият ортади, эзгу мақсадлар қанот ёзади. Бугунги мукофотлар эса Жиззахда Ватан тараққиётига муносиб ҳисса қўшаётган инсонлар сафида янги куч ва ишонч билан меҳнат қилиш истагини янада мустаҳкамлади.
А.Қаюмов, Ж.Ёрбеков (сурат), ЎзА мухбирлари
