Вашингтонда Туркий дунё истиқболлари муҳокама қилинди
АҚШ пойтахти Вашингтон шаҳрида “Heritage Foundation” томонидан “Марказий Осиёдан Қора денгизгача: Туркий дунёнинг келажаги” мавзусида семинар бўлиб ўтди. Мазкур тадбирда Туркий давлатлар ташкилоти (ТДТ) Бош котиби, элчи Кубаничбек Ўмуралиев иштирок этиб, маъруза қилди.
Семинар доирасида АҚШнинг етакчи таҳлил марказлари экспертлари ва тадқиқотчилари билан кенг қамровли фикр алмашуви ташкил этилди. Унда Туркий минтақанинг бугунги ўрни ва истиқболдаги ривожланиш йўналишлари муҳокама қилинди.
Ўз нутқида Бош котиб ТДТнинг тобора ортиб бораётган стратегик аҳамиятига алоҳида тўхталиб, Ташкилот Марказий Осиёдан Қора денгиз ва Ўрта ер денгизигача бўлган улкан географик ҳудудни қамраб олган, тўлиқ институционаллашган ва натижадорликка йўналтирилган ҳукуматлараро тузилмага айланганини таъкидлади. Шунингдек, иқтисодий ривожланиш, транспорт ва логистика алоқадорлиги, хавфсизлик ҳамда халқлар ўртасидаги ҳамкорлик йўналишларида яқинлашув изчил кучайиб бораётгани қайд этилди.
Музокаралар чоғида иштирокчилар АҚШ сиёсатчилари ва таҳлил марказларининг Туркий минтақага бўлган қизиқиши ортиб бораётганини, шунингдек, Туркий диаспоранинг глобал муаммоларни муҳокама этиш ва ечим топишдаги роли тобора кучайиб бораётганини эътироф этди. Ушбу омиллар Америка томонининг таҳлиллари ва сиёсий қарорларини шакллантиришда муҳим аҳамият касб этаётгани таъкидланди.
Ҳамроз Баянов, ЎзА
