Вашингтон Теҳрондан ядровий дастур бўйича аниқ қадамлар кутмоқда
АҚШ Эрон билан низони тугатиш мақсадида Теҳрондан уран бойитиш қувватини сезиларли даражада қисқартиришни талаб қилмоқда. Қўшма Штатлар вице-президенти Жей Ди Вэнс Вашингтон “сўз эмас, аниқ ҳаракат” кутаётганини урғулади.
У “Reuters” ахборот агентлигига берган интервьюсида ядровий қурол яратиш нияти йўқлигини исботламоқчи бўлган Эрон уранни 60 фоизгача бойитишни давом эттирмаслиги кераклигини таъкидлади. Вэнснинг айтишича, ҳар қандай келишув Теҳроннинг ядровий дастур бўйича аниқ ён беришини назарда тутиши лозим.
Томонлар сўнгги ҳафталарда зиддиятни тўхтатиш ва жаҳон энергетикаси учун муҳим бўлган Ҳурмуз бўғозини қайта очиш бўйича таклифлар алмашган. Оқ уй раҳбари Дональд Трамп Эроннинг сўнгги таклифини рад этган ва ҳарбий ҳаракатлар яна кучайиши мумкинлигини билдирган.
Музокаралардаги асосий муаммолардан яна бири — АҚШ Эронда қарорларни ким қабул қилаётганини аниқ билмаётгани. Вэнс президент Масъуд Пезешкиён ва ташқи ишлар вазири Аббос Арақчий билан мулоқотлар давом этаётганини, аммо уларнинг ҳақиқий ваколати қанчалик экани ноаниқлигини айтди.
Эрон Ташқи ишлар вазирлиги бу фикрни рад этиб, Вашингтон мамлакатдаги қарор қабул қилиш тизимини яхши билишини таъкидлади. Экспертлар фикрича, урушнинг иқтисодий оқибатлари АҚШда ҳам сезилмоқда: можаро ҳар ой тахминан 3 миллиард долларга тушмоқда, энергия нархларининг ошиши эса Трамп маъмуриятига сайловлар олдидан қўшимча босим яратмоқда.
Мусулмон Зиё, ЎзА
