UZCARD CyberWeek 2.0’ни давом эттирмоқда: икки кун, икки йўналиш, ягона вазифа — хавфсиз рақамли муҳит
29–30 сентябрь кунлари Урганч шаҳрида CyberWeek 2.0 лойиҳасининг навбатдаги ҳудудий босқичи бўлиб ўтди.
CyberWeek 2.0 — UZCARD, Ўзбекистон Республикаси Ички ишлар вазирлиги, Ўзбекистон Республикаси Марказий банки ва Ўзбекистон маҳаллалари уюшмасининг аҳолининг рақамли саводхонлигини ошириш, киберфирибгарликнинг олдини олиш ҳамда рақамли молиявий хизматлардан хавфсиз фойдаланиш маданиятини шакллантиришга қаратилган қўшма ташаббусидир.
Ҳудудий босқич иккита иш йўналишини бирлаштирди: банк сектори вакиллари билан профессионал мулоқот ва маҳалла вакиллари билан маърифий ишлар. Бундай формат бир вақтнинг ўзида молия соҳаси даражасида киберхавфсизлик масалаларини муҳокама қилиш ҳамда ҳудудлар аҳолиси билан бевосита мулоқот қиладиган вакилларга амалий билимларни етказиш имконини беради.
29 сентябрь куни Урганч шаҳар ҳокимлиги биносида банк сектори вакиллари учун ихтисослаштирилган семинар бўлиб ўтди. Иштирокчилар долзарб кибертаҳдидлар, молиявий хизматлар фойдаланувчиларини ҳимоя қилиш масалалари, рақамли фирибгарликнинг олдини олиш ҳамда нақдсиз тўловлар хавфсизлигини таъминлашнинг замонавий ёндашувларини муҳокама қилдилар. Фирибгарликка қарши курашишнинг амалий жиҳатларига, шунингдек фойдаланувчиларнинг кенг тарқалган ижтимоий муҳандислик схемалари, фишинг ва бошқа турдаги рақамли таҳдидларга нисбатан чидамлилигини ошириш заруратига алоҳида эътибор қаратилди.
30 сентябрь куни дастур Маъмун университетида давом этди. Бу ерда маҳалла вакиллари учун рақамли саводхонлик ва киберхавфсизлик бўйича семинар ўтказилди. Иштирокчиларга рақамли молиявий хизматлардан хавфсиз фойдаланиш, шахсга доир ва тўлов маълумотларини ҳимоя қилиш, шунингдек кенг тарқалган фирибгарлик схемалари ҳақида амалий материаллар тақдим этилди.
Олинган билим ва материаллардан маҳалла вакиллари аҳоли билан олиб бориладиган кейинги маърифий ишларда фойдаланишлари мумкин. Бу аҳолига рақамли муҳитда яхшироқ йўналиш олиш, эҳтимолий таҳдидларни аниқлаш ҳамда шубҳали қўнғироқлар, хабарлар ёки таклифларни олганда ўйламай қилинган ҳаракатлардан сақланишга ёрдам беради.
«Биз учун рақамли хавфсизлик бўйича билимлар фақат профессионал ҳамжамият доирасида қолиб кетмаслиги муҳим. Маҳалла вакиллари билан ишлаш амалий тавсияларни бевосита рақамли хизматлардан ҳар куни фойдаланадиган ва фирибгарликнинг янги схемаларига дуч келадиган аҳолига етказиш имконини беради», — деди «UCMG» МЧЖ Бош директорининг ахборот хавфсизлиги масалалари бўйича ўринбосари Нуржау Болатбек.
CyberWeek иккинчи йил давомида амалга оширилмоқда ва босқичма-босқич ҳудудий таълим тадбирлари туркумидан рақамли саводхонликни ошириш ҳамда киберфирибгарликнинг олдини олиш бўйича тизимли дастурга айланиб бормоқда. Лойиҳа доирасида банк сектори вакиллари учун ихтисослаштирилган семинарлар ва ҳудудлар аҳолиси учун маърифий тадбирлар ўтказилмоқда.
2025–2026 йиллар якунларига кўра, CyberWeek таълим тадбирларида 3 500 нафардан ортиқ киши иштирок этди, лойиҳанинг умумий медиа ва телевидение қамрови эса 10 миллион кишидан ошди. Ахборот кампанияси доирасида 2,92 миллион нафар аҳоли қамраб олинди. Лойиҳа амалга оширилган давр мобайнида олтитадан ортиқ ҳудудий босқич ўтказилди.
2026 йилда CyberWeek таълим форматларини ҳам кенгайтирди. APK-фирибгарлиги, сохта инвестиция ва савдо таклифлари, шунингдек онлайн харидлар пайтидаги фирибгарлик каби кенг тарқалган фирибгарлик сценарийлари ҳақида қисқа видеороликлар тайёрланди. Амалий материаллар оддий алгоритм асосида тузилган: таҳдидни аниқлаш, тўхташ ва ўз маълумотлари ёки пул маблағларини бегона шахсларга бермаслик.
CyberWeek 2.0 давлат органлари, молия сектори ва экспертлар ҳамжамиятини ягона вазифа — рақамли муҳитни янада хавфсиз қилиш ва фойдаланувчиларга замонавий кибертаҳдидлардан ҳимояланиш бўйича амалий кўникмаларни шакллантиришга кўмаклашиш атрофида бирлаштиради.
UZCARD. Қулай яшанг.
ЎзА
