Туркия футболида катта тергов: нишонда 3700 нафар футболчи
Истанбул шаҳар прокуратураси Туркия Футбол федерацияси билан боғлиқ 19 клуб менежери иштирокидаги ноқонуний пул тикиш иши бўйича тергов олиб бормоқда. Терговчилар 2020 йилдан 2026 йилгача бўлган давр учун пул тикиш платформаларидан олинган маълумотларни таҳлил қилишди.
Туркия адлия вазири Акин Гурлекнинг сўзларига кўра, тергов доирасида 17 киши ҳибсга олинган ва мамлакат бўйлаб ўнта вилоятда тинтувлар ўтказилган. Ўлканинг турли лигаларидан тахминан 3700 нафар футболчи, жумладан, юқори дивизиондаги 25 нафар футболчи гумон қилинмоқда. Уларнинг кўпчилиги бир йилгача дисквалификация қилинган.
Бундан ташқари, Туркия Футбол федерацияси тахминан 150 нафар ҳакамни вақтинчалик четлатди. Терговчиларнинг фикрига кўра, уларнинг баъзилари юз марталаб ўйинга пул тикишган, жумладан, ўз жамоаларининг ўйинларига ҳам.
С.Раҳимов, ЎзА
