Трампга яна суиқасд уюштирилди(ми)?
“The New York Times” нашри ёзишича, номаълум шахс АҚШ президенти ва маъмуриятининг қатор юқори мартабали мулозимлари иштирок этаётган Оқ уй мухбирлари ассоциациясининг йиллик зиёфати ўтказилаётган “Washington Hilton” меҳмонхонасида отишма уюштирган.
Таъкидланишича, мамлакат етакчиси, амалдорлар ва тадбир иштирокчилари воқеа жойидан дарҳол эвакуация қилинган.
Кейинроқ Трамп Махфий хизмат ходимлари ўқ узганликда гумон қилинган шахсни қўлга олганини маълум қилди. Унга кўра, ҳужумни содир этган шахс – 31 ёшли Коул Томас Аллен бўлиб, у Калифорния штатининг Торранс шаҳрида яшайди. Бироқ бу маълумот ҳозирча расмий ҳуқуқ-тартибот идоралари томонидан тасдиқланмаган, тергов ишлари давом этмоқда.
Ҳодиса оқибатида жабрланганлар ҳақида хабар берилмаган. Орадан бироз вақт ўтиб, Трамп брифинг ўтказди.
- Вашингтондаги тадбирда отишма уюштирган шахс ўзи билан бир нечта қурол олиб юрган, - деди Қўшма Штатлар президенти воқеага изоҳ берар экан.
Ў.Алимов, ЎзА
